काठमाडौँ । एनआरएनए आईसिसि सदस्य अनुज थापा पक्राऊ परेका छन् ।  ठगी मुद्दामा उजुरी परेपछि महानगरीय प्रहरी परिसर काठमाडौंले उनलाई लैनचौरबाट पक्राउ गरेको हो ।

थापामाथि जापानी प्रोफेसर यामामोतो हिराकुको ७ करोड रुपैयाँ ठगेको आरोप छ । एनआरएनको एक कार्यक्रममा सहभागी भइरहेका बेला परिसरबाट खटिएको टोलीले थापालाई पक्राउ गरेको हो । परिसरका प्रमुख एसएसपी रवीन्द्रसिहं धानुकका अनुसार काठमाडौं जिल्ला अदालतबाट न्यायिक हिरासतमा राख्ने अनुमती लिई ठगी अभियोगमा अनुसन्धान सुरु गरीसकिएको छ ।

जापानमा रेस्टुरेन्ट विजनेस गर्ने थापाले प्रोफेसर हिराकुलाई नेपालमा शिक्षाका अवस्था दयनीय रहेको भन्दै स्कुल खोल्नका निम्ति आर्थिक सहायता लिएका थिए । प्रहरीका अनुसार थापाले स्कुल निर्माणका लागि भन्दै ६ करोड रुपैयाँ लिएलगत्तै प्रोफेसर हिराकुसँग सम्पर्क बाहिर रहेका थिए । सम्झौता अनुसार स्कुल नबनाई उनले निजी घर गाडी खरिद गरेका थिए ।

स्कुल निर्माण भएको झुटो आश्वासन दिँदै आएका थापाले स्कुलबारे कुनै प्रगती विवरण नदिएपछि प्रोफेसर हिराकु आफुमाथि विश्वासघात भएको र रकम ठगिएको निष्कर्षमा पुगेको थिए । प्रोफेसर हिराकुले आफ्नो रकम फिर्ता दिन वा स्कुलको अवस्थाबारे बताउन आग्रह गरेपछि थापा जापानको रेस्टुरेन्ट भाडामा लगाएर बीचको केही समय नेपाल फर्केका थिए । बारम्बार झुक्काउँदै हिडिरहेका थापालाई पक्रिन हिराकुले लामो समयदेखि प्रयत्न गरिरहेका थिए ।

एनआरएन सम्मेलनमा भाग लिनका निम्ति थापा नेपाल आएको थाहा पाएर प्रोफेसर हिराकुले प्रहरी परिसर काठमाडौंमा जाहेरी दरखास्त दिएका थिए । त्यसैका आधारमा प्रहरीले उनलाई पक्राउ गरेको हो । एनआरएन जापानको पछिल्लो निर्वाचनमा उनी अध्यक्षका प्रत्यासी समेत बनेका थिए । तर, चुनावको मुखमा उम्मेदवारी फिर्ता लिएपछि उनलाई आईसीसी सदस्य बनाइएको थियो ।