टोकियो/जापान। जापानी प्रधानमन्त्री फुमियो किशिदाले मंगलबार आफ्नो सरकारले मुद्रास्फीतिको निर्णायक अन्त्य गर्दै, वास्तविक आय वृद्धि हासिल गर्न “सम्भव हुने सबै कुरा” गर्ने बताएका छन्।

“मेरो प्रशासनको सबैभन्दा ठूलो मिशन भनेको अर्थतन्त्रलाई पुनर्जीवित गर्नु हो,” किशिदाले तल्लो सदनको पूर्ण बैठकलाई नीतिगत सम्बोधनका क्रममा भने। “अर्थव्यवस्था, विशेष गरी ज्याला वृद्धि, एक जरुरी मुद्दा हो।”

उनले कुनै नयाँ नीति घोषणा नगरेपनि आफ्नो सत्तारुढ दल लिबरल डेमोक्र्याटिक पार्टी (एलडीपी) लाई एक दशक भन्दा बढीमा सबैभन्दा कम समर्थन प्राप्त भएको कोष घोटालाको बीचमा राजनीतिमा जनताको विश्वास पुन: प्राप्त गर्ने आवश्यकतामा जोड दिएका थिए।

दिगो ज्याला वृद्धि र स्थिर मुद्रास्फीति हासिल गर्नु यस वर्षको वसन्तमा रोजगारदाता र कामदारहरू बीचको वसन्त ज्याला वार्ताको केन्द्रविन्दु हो र यसले बैंक अफ जापानलाई यसको स्वाधिन मौद्रिक प्रोत्साहनबाट बाहिरिने मार्ग प्रशस्त गर्न सक्ने आँकलन गरिएको छ।

गत वर्ष, जापानका ब्लु चिप फर्महरूले ३.६% ज्याला वृद्धि प्रस्ताव गरेका थिए, जुन तीन दशकमा सबैभन्दा उच्च हो, र अर्थशास्त्रीहरूले अब यस वर्षको ज्याला वृद्धिलाई झण्डै ३.९% मा पुग्न सक्ने अपेक्षा गरेका छन्।

किशिदाले भने कि उनको प्रशासनले न्यूनतम पारिश्रमिक वृद्धिको विषयलाई उठाएको छ र चिकित्सा तथा कल्याणकारी सेवाहरूमा सार्वजनिक क्षेत्रका कामदारहरू साथै ट्रक चालकहरू, र अल्पकालिन, करार कामदारहरू सहित गैर-नियमित कामदारहरूको समेत तलब बढाउन खोजेको छ।

किशिदाले ज्याला वृद्धिको शीर्षमा, आम्दानीमा अस्थायी कटौती र प्रतिव्यक्ति जुनदेखि लागु हुने ४०,००० येनको आवासीय करहरू छुट हुने व्यवस्थाले सहजता सिर्जना गर्ने बताएका छन् ।