काठमाडौं, अक्टोबर २७। नेपालीहरूको महान् पर्व दशैं, तिहार तथा छठको अवसरमा गैरआवासीय नेपाली संघ (एनआरएनए) एशिया प्रशान्त क्षेत्रले नुवाकोटमा ज्येष्ठ नागरिकका लागि आर्थिक सहयोग वितरण कार्यक्रम आयोजना गर्ने भएको छ।

संघका एशिया प्रशान्त क्षेत्रीय संयोजक दीपक कँडेलले दिएको जानकारीअनुसार मंगलबार नुवाकोटको विदुर नगरपालिका–५, देवीघाटस्थित देवीघाट ज्येष्ठ नागरिक संरक्षण तथा अध्ययन प्रतिष्ठानमा आर्थिक सहयोग वितरण कार्यक्रम आयोजना गर्न लागिएको हो।

ज्येष्ठ नागरिकप्रति सम्मान, सद्भाव र सामाजिक उत्तरदायित्वको भावनासहित आयोजना गर्न लागिएको कार्यक्रम नेपाली समयअनुसार दिउँसो १ बजेदेखि सुरु हुनेछ।

संयोजक कँडेलले हाल नेपालमा रहेका सम्पूर्ण गैरआवासीय नेपाली अभियन्ता तथा शुभेच्छुकहरूलाई कार्यक्रममा सहभागी हुन हार्दिक आह्वान गरेका छन्।

नेपालीहरूको महत्वपूर्ण चाडपर्वको अवसर पारेर आयोजना गरिएको यस कार्यक्रमले ज्येष्ठ नागरिकप्रति सम्मान र सेवाभाव अभिवृद्धि गर्नुका साथै गैरआवासीय नेपालीहरूको सामाजिक उत्तरदायित्वलाई थप प्रोत्साहन गर्ने अपेक्षा गरिएको छ।