काठमाडौं, मंसिर १३ । विश्वको सबैभन्दा ठूलो कम्युनिस्ट राष्ट्र चीनको चिनियाँ कम्युनिस्ट पार्टीले नेपालको माओवादीलाई पहिलो नम्बरमा राखेको छ । उसले विश्वका ६ सय कम्युनिस्ट पार्टीमध्ये नेकपा (माओवादी केन्द्र)लाई पहिलो नम्बरमा सूचीकृत गरेको जनाएको छ ।

चीनमा जारी नेकपा (माओवादी केन्द्र) र चिनियाँ कम्युनिस्ट पार्टीका प्रतिनिधिको छलफल तथा राजनीतिक भेटघाटक्रममा चिनियाँ कमयुनिस्ट पार्टीका विदेश विभागका एसिया ब्युरो प्रमुख साव लिङले नेपालको माओवादी आफूहरूको पहिलो नम्बरमा रहेको बताएका हुन् । उनले नेपाली माओवादीप्रति चीन गम्भीर र सकारात्मक भएको पनि बताए ।

नेपाली राजनीतिको अग्रस्थानमा रहेको माओवादी केन्द्रले गणतन्त्र स्थापना, संविधान निर्माण र शान्ति प्रक्रियाका हाँक्न खेलेका अहं भूमिकाप्रति चीन जानकार रहेको जनाउँदै साव लिङले माओवादी केन्द्रका अध्यक्ष पुष्पकमल दाहाल (प्रचण्ड) को प्रशंसासमेत गरेका छन् ।

उनले चीनको कम्युनिस्ट पार्टीको केही समयअघि मात्रै सम्पन्न १९औं महाधिवेशबाट नयाँ समाजवादी क्रान्तिको नीति लिएको अवस्थामा नेपालले मौलिक शैलीको समाजवादको नीति लिएर अघि बढे राम्रो हुने कुरामा जोड दिएका थिए ।