मोगादिसु / एजेन्सी– सोमालियाको मोगादिसुमा शुक्रबार भएका बम विस्फोटमा परी १८ जनाको मृत्यु भएको छ । दुर्घटनामा परी २० जना घाइते भएका छन् ।

शुक्रबार राजधानी मोगादिसुमा दुईवटा विस्फोट भएका थिए । त्यसमध्ये एउटा बम आक्रमण राष्ट्रपति निवासलाई लक्षित गरिएको थियो ।

विस्फोट भएका स्थानबाट १८ वटा शव संकलन गरिएको छ । सोमालियाको सुरक्षा फौजले राष्ट्रपति कार्यालयमा गर्न लागेको विस्फोटनलाई असफल पारेको अधिकारीले बताएका छन् ।पहिलो विस्फोटन स्थानीय समयानुसार बेलुका ६ बजे भएको थियो भने दोस्रो विस्फोट त्यसको केही समयपछि सोमालियाको भिल्ला भन्ने स्थानमा भएको थियो ।

तालिवानी समूहको आक्रमणमा २५ सैनिकको मृत्यु

यसैगरी तालिवानी समूहले अफगानिस्तानको पश्चिमी फराह राज्यमा रहेको सैनिक शिविरमा गरेको आक्रमणमा परी कम्तीमा २५ जना अफगानी सेनाको मृत्यु भएको छ ।

तालिवानी समूहको सयौंको संख्यामा आएका सशस्त्र लडाकुले कानेस्क क्षेत्रमा रहेको शिविरमाथि एक्कासि आक्रमण गरेपछि दुई पक्षबीच शुक्रबार रातभर भीडन्त भएको र रातभरको लडाइँमा केही सैनिक अधिकारीको मृत्यु भएको प्रान्तीय सरकारका प्रवक्ता नसीर मेहरीले बताए ।

सो झडपमा विद्रोहतर्फ पनि क्षति भएको तर मृतक विद्रोहीलाई उनीहरूले नै बोकेर लगेकाले एकीन संख्या थाहा हुन नसकेको उनले सिन्ह्वा न्युज एजेन्सीलाई बताए । घटनास्थलमा थप आक्रमण हुन सक्ने सम्भावना नभए पनि सावधानीका लागि केही सुरक्षाकर्मीलाई त्यसतर्फ पठाइएको बताइएको छ ।

यसबारे तालिवान समूहको औपचारिक धारणा अहिलेसम्म पाउन सकिएको छैन । यता राजधानी काबुलमा भएको आत्मघाती बम हमलामा चाहिँ कम्तीमा तीन सुरक्षाकर्मीको ज्यान गएको छ । घटना काबुलको कूटनीतिक क्षेत्रमा भएको थियो ।

त्यस्तै, हेलमन्द प्रान्तमा भएको अर्को आक्रमणमा दुई जना सुरक्षाकर्मी मारिएका छन् । एक जना लडाकुले विस्फोटक पदार्थले भरिएको सवारीसाधन एउटा सुरक्षा जाँचचौकीमा लगेर ठोक्काएको थियो ।

सोही प्रान्तमा अर्को आक्रमणसमेत भएको बताइएको छ । तर यो समाचार तयार पार्दासम्म एकीन विवरण आउन सकेको छैन ।