टोकियो/जापान । जापानभर कोरोना संक्रमितको संख्या ह्लात्तै बढ्न गई,तोकिएका अस्पतालहरुमा बेड खाली नहुँदा,अति प्रभावित क्षेत्रहरुका १५ हजार जनाभन्दा बढी कोरना संक्रमित बिरामीहरु अस्पत्ताल भर्ना हुन पाएका छैनन् ।

क्योदो न्युजले गरेको एक सर्वेक्षणका अनुसार, यहि जनवरी ७ तारिख तथा पछि थप गरिएका आपतकाल कायम ११ ओटा प्रान्तहरुका सार्वजनिक स्वास्थ्य केन्द्रहरुमा थाम्नै नसक्ने गरी बीरामीहरुको चापमा परेका छन् । जसको परिणाम स्वरुप कोरोना संक्रमण पुष्टि भएर अस्पताल भर्ना गराउनुपर्ने अवस्थाका बिरामीहरुलाई पनि घरमै बसेर पालो कुर्न लगाईरहेका छन् । सर्वेक्षणका अनुसार अस्पतालहरुमा बेड अभावका साथै कोरोना संक्रमितहरुलाई राख्न तोकिएका होटलहरुमा पनि अहिले कोठाहरु भरिएका छन् ।

यसरी, अस्पतालमै भर्ना भएर उपचार गराउनुपर्ने बिरामीहरु घरमै बस्न बाध्य हुनुपर्दा केहि बिरामीहरुको मृत्यु समेत भईसकेको जापानी समाचार माध्यमहरुमा खबर प्रकाशित हुने गरेको छ । गम्भीर प्रकृतीका बिरामीहरु बढी, स्वास्थ्य क्षेत्रमा सघन चाप ब्योहोर्नेमा, टोकियो, साईतामा, चिबा, खानागावा, ह्योगो, ओसाका, आइची लगायतका प्रिफ्क्चरहरु अग्रस्थानमा रहेका छन् ।

गतवर्षको नोभेम्बरबाट जापानमा अत्यधिक बढेको कोरोना संक्रमण अझै नियन्त्रणको दायरामा आउन सकेको छैन । देशैभर हरेक दिन नयाँ संक्रमितहरु बढिरहेका छन् । यहि क्रममा कोरोना पुष्टि भएर पनि अस्पत्ताल एवं तोकिएका केयर सेन्टरहरुमा जाने प्रतिक्षामा रहनेहरुको संख्या १५ हजार ५८ जना पुगेको छ । जसमा सबैभन्दा बढी टोकियोका वासिन्दाहरु छन् । सर्वेक्षणले देखाए अनुसार टोकियोमा यसरी घरमै बस्न बाध्य भएका बिरामीहरु गत वर्षको डिसेम्बरको तुलनमा ४.८ पटकले वृद्दी भई ७ हजार ५ सय ३९ जना पुगेका छन् । ह्योगो प्रिफेक्चरमा पनि, डिसेम्बर महिनाको तुलनामा ५.८ पटकले बढेर,७२७ जना बिरामीहरु घरमै पालो कुरेर बसिरहेका छन् । यसैगरी प्राय सबैजसो प्रान्तमा वृद्दी भएको छ ।

आईतबारसम्ममा,जापानभर ३ लाख ६६ हजार ४ सय ३५ जनामा कोरोना संक्रमण पुष्टि भएको छ । संक्रमित मध्ये २ लाख ९१ हजार २ सय १ जनाले स्वास्थ्य लाभ लिएका छन् भने ५ हजार १ सय ३३ जनाको मृत्यु भएको छ ।