ओकिनवा/जापान । विश्वका धेरै मानिसहरुलाई यो थाह छ, कि जापानका विद्यालयहरुमा एकदमै सुव्यवस्थित र अनुशासित वातावरण हुन्छ ।

तर, ओकिनवा केनको एक विद्यालयमा, हालसम्म कसैलाई पनि थाह नभएको र कसैले कल्पना नै नगर्ने घटना घटेको खबरहरु प्रकाशनमा आएको छ । जापानी संचार माध्यमहरुमा प्रकाशित खबरका अनुसार, ओकिनवा केनको एक विद्यालयका शिक्षकले कक्षा कोठाभित्र पढाउँदा पढाउँदै मद्यपान गरेका छन् ।

ओकिनवाको मुख्य सहरमा रहेको एक एलिमेन्ट्री स्कुलका शिक्षकले गत फेब्रुअरी महिनाको २२ र २६ तारिख २ पटकसम्म कक्षा कोठामै बसी( विद्यार्थीहरुलाई क्लासवर्क गर्न लगाएको बेला) च्युहाई (क्यानमा पाईने जापानी अल्कोहल जन्य पेयपदार्थ,जस्मा अधिकतम १२ प्रतिशत सम्म अल्कोहल हुनेगर्दछ) पिएको भेटिएको हो । विद्यार्थीले शिक्षकको पेय पदार्थको क्यान देखेपछि अर्का शिक्षकसंग यसबारे जानकारी गराएका थिए । ति सहकर्मी शिक्षकले यसबारे सोधपुछ गर्दा, उनले आवेगमा आफूले, मद्यपान गरेको स्विकार गरेका थिए ।

उक्त घटना पुष्टि भएपछि यहि अप्रिल १५ मा ओकिनवा प्रान्तिय शिक्षा बोर्डले ति शिक्षकलाई स्थानीय लोक सेवा ऐन अन्तर्गत रहि अनुशासनको कारबाही स्वरुप ३ महिनासम्मलाई उनको
तलबमा १० प्रतिशत कटौती गरेको बताएको छ । उनलाई कारबाही गर्दै शिक्षा बोर्डका प्रमुखले शिक्षकको अनुशासनहिन हर्कतप्रति माफी पनि मागेका थिए ।