टोकियो/जापान । जापानको ओसाकाबाट ओलम्पिक खेलमा सहभागी नै नभई भागेका युगान्डाका ओलम्पिक खेलाडी ज्युरियसलाई अन्तत: बुधबार नारिता एयरपोर्ट हुँदै युगान्डा फर्काईएको छ ।

ओलम्पिकको पूर्वतयारीका लागि जापानको ओसाको एक होटलमा बसेका ज्युरियस गत १६ तारिखबाट भागेका थिए । उनले होटलबाट भाग्नुअघि -‘जिवन धान्नै निकै कठिन् हुने मुलुकमा नफर्की जापानमै काम गर्न चाहन्छु’ भन्ने नोट लेखेर होटल छाडेको बताईएको थियो । त्यस पश्चात निरन्तर खोजीमा रहेको प्रहरी तथा ओलम्पिक आयोजक समितिको सकृयतामा मंगलबार उनलाई मिए केनको योक्काची सहरमा फेला पारिएको थियो ।

ओलम्पिक खेल्न आएका उनको त्यस किसिमको हर्कत पछि, उनलाई फेरि उनकै युगान्डाली खेलाडीहरुको समूहमा पठाउने या तुरुन्तै युगान्डा नै फर्काई हाल्ने भन्ने विषय टुंगो लगाउन, टोकियोको सिवुया वार्डमा रहेको युगान्डाको राजदुतावासमा जिम्मा लगाईएको थियो ।

राजदुतावास तथा अन्य सरोकारवालाहरुसंगको छलफलपछि उनलाई तत्काल देश फर्काउने निर्णय गरिएको र सोहि अनुरुप बुधबार राती नै नारिता एयरपोर्टबाट विमानमा चढाईएको जापानी संचार माध्यमहरुले खबर छापेका छन् ।