टोकियो/जापान । सुन्दा अचम्म लाग्ला कि, जापानमा पनि विद्यार्थीहरु विद्यालयमा अनुपस्थित हुने संख्या बढ्दो छ । यद्यपी यस पटकको अनुपस्थितिलाई भने कोरोना भाईरस महामारीले बढाएको देखिन्छ ।

सरकारले बुधबार जारी गरेको प्रतिवेदन अनुसार आर्थिक वर्ष सन २०२० मा १ लाख ९६ हजार १२७ जना विद्यार्थीहरु विद्यालयमा अनुपस्थित रहे । यसरी विद्यालय अनुपस्थित हुने यो डाटा प्राथमिक तथा निम्न माध्यमिक विद्यालयस्तरका विद्यार्थीहरुको हो । यो संख्या अघिल्लो वर्षको तुलनमा १४ हजार ८ सय ५५ जनाले बढेको हो ।

उक्त अध्ययन अवधिमा विद्यालयहरुमा बुलिङ (बदमासी, थिचोमिचो, डर देखाइनु) का ५ लाख १७ हजार १६३ कायम भएका छन् । बुलिङका घटना भने पहिलेको तुलनामा ९५ हजार ३ सय ३३ ले घटेको हो । जापानका प्रथमिक स्कुलदेखि उच्च तहसम्म पनि यस्ता बुलिङ्का घटनाहरु व्यापकरुपमा हुने गरेका छन् । कतिपय अवस्थामा यसैका कारण विद्यार्थीहरु विद्यालय नजाने तथा आत्महत्या जस्ता कठोर निर्णयमा समेत पुग्ने गरेका छन्।

यसका अलवा सो अध्ययन अवधिमा विद्यलायस्तरका विद्यार्थीहरुको आत्महत्या संख्या ४ सय १४ जना कायम भएको छ । यो अघिल्लो वर्षको तुलनामा ९८ जनाले वृद्दी भएको हो ।