टोकियो/जापान। जापानमा कोभिड भ्याक्सिन लगाईसकेको प्रमाण दिने क्युआर कोड सहितको स्मार्ट फोन एप्लिकेसन संचालनमा ल्याईने भएको छ ।

कुल जनसंख्याको ७०.६ प्रतिशत जनताहरुले खोपको पुर्ण मात्र लगाईसकेको जापानमा यस्तो भ्याक्सिन लगाएको प्रमाणस्वरुप प्रयोग गर्न सकिने एप्लिकेसनको प्रयोगबाट टोकियो महानगर लगायतका कतिपय स्थानहरुका रेस्टुरेन्टहरुमा छुटका कुपनहरु पनि प्राप्त गर्न सकिनेछ ।

यस्तो एप्लिकेसन टोकियो महानगरले यहि आउँदो नोभेम्बर १ बाट संचालममा ल्याउनेछ । संगै अन्य विभिन्न प्रान्त तथा त्यहाँका स्थानिय सरकारहरुले पनि क्रमिकरुपमा आ/आफ्नै प्रकारका भ्याक्सिन लगाएको प्रमाणको रुपमा प्रयोग गर्न सकिने एप्स संचालन ल्याउनेछन् । टोकियो महानगरले टोकियो भ्याक्सिन (Tokyo ワクチン) बाट लिंक गरि आफुले खोप लगाएको प्रमाण कायम गर्न सक्छन् ।

टोकियो महानगरले केहिदिन अघि मात्रै रेस्टुरेन्ट तथा बारहरुमा कायम समय सिमा हटाएर निर्वाधरुपमा संचालन गर्न सक्ने व्यवस्था गरेको छ । यो संगै ५ जना वा सो भन्दा माथीको सामुहिक खान/पान तथा जमघटका लागि खोप लगाएको प्रमाण प्रस्तुत गर्नुपर्ने नियम पनि लागु गरिने बताएको थियो । त्यसैलाई सहजीकरण गर्दै यो एप्लिकेसन प्रयोगमा ल्याउन लागिएको हो ।

यसरी जापानभित्रै प्रयोगमा आउने भ्याक्सिन प्रमाण प्रदान गर्ने एप्सहरुको प्रयोगमा गुन्मा तथा ओकिनवामा पनि (भिन्न प्रकारको ) सुरुगरिएको बताईएको छ ।