टोकियो/जापान । जापानमा फेरि थप १४ जनामा ओमिक्रोन भेरियन्ट संक्रमण पुष्टि भएको छ ।यो संख्यासंगै जापानमा ओमिक्रोन संक्रमित संख्या ८२ जना पुगेको छ ।

स्वास्थ्य मन्त्रालयका अनुसार,यो १४ जनामा यहि डिसेम्बर १२ देखि १६ तारिखको बिचमा संक्रमण पुष्टि भएको हो । उनिहरु नारिता, हानेदा तथा कान्साई विमानस्थल हुँदै जापान प्रवेश गर्ने क्रममा संक्रमण पुष्टि भएका हुन् । पछिल्लो पटक संक्रमण पुष्टि हुनेहरुमा १० वर्ष देखि ६० वर्ष उमेर समुहसम्मका मानिसहरु रहेका छन् ।

ति संक्रमितहरु अमेरिका, बेलायत, कंगो तथा दक्षिण सुडानमा पछिल्लो १४ दिनभित्रमा पुगेको/ बसेको रेकर्ड भएका व्यक्तिहरु
हुन् । व्यक्ति सुचनामा उच्च गोपनियता कायम राख्ने जापानले कुन/कुन देशका नागरिकहरु संक्रमित भए भन्ने प्रष्ट डेटाहरु भने सार्वजनिक गरेको छैन ।

पछिल्लो पटक पुष्टि भएका १४ जना संक्रमित मध्ये २ जनामा ज्वरो तथा खोकीको लक्षण देखिएको थियो भने बाँकी १२ जनामा कुनै पनि लक्षणहरु नभएको बताईएको छ । जापानमा ति संक्रमितहरुसंगै जहाजमा आएका, परिवारका सदस्य, साथी लगायतका उनिहरुको नजिकको सम्पर्कमा रहेका १ हजार जना भन्दा बढी मानिसहरु संक्रमण जोखिमको सुचीमा छन् ।