योकोहमा/जापान । जापानको खानागावा प्रान्तको योकोहमा नगरका एक जना ६० वर्ष उमेर समूहका पुरुषले कोरोना विरुद्धको ४ वटा खोप लगाएको खुलासा भएको छ ।

ति व्यक्ति, एक चिकित्सालयको सरसरफाई विभागमा काम गर्ने कर्मचारी भएकाले जापान सरकारले प्राथमिकताको आधारमा खोप बितरण गर्दा पहिलो पटक २ वटा र पछि फेरि स्थानिय निकायले सबै नागरिकहरुलाई खोप वितरण गर्दा २ पटक गरि, कुल ४ पटक खोप लगाएका हुन् ।

ति व्यक्तिले अघिल्लो वर्षको मार्च र अप्रिलमा पहिलो र दोस्रो खोप लगाएका थिए भने सेप्टेम्बर डिसेम्बर महिनामा तेस्रो र चौथो खोप लगाएको खुलासा भएको हो । उनले खोप लगाउने फारममा पहिले खोप लगाएको कुरा लुकाएकाले कसैले पनि पत्ता लगाएका थिएनन् ।

अघिल्लो महिना ति व्यक्ति आफैले भ्याक्सिन पासपोर्ट बनाउनका लागि भनेर फोन गर्दा,उनले ४ वटै खोप लगाएको कुरा खुल्न आएको हो । यसो गर्दा स्वास्थ्यमा प्रतिकुल असर पर्ने सम्भावना मानिसहरुलाई सचेत गराउनु आवश्यक रहेको भन्दै योकोहमा सहरले राष्ट्रिय सरकारलाई रिपोर्ट गरेको छ ।