टोकियो/जापान । जापान बिजनेस फेडेरेसनका प्रमुख तोकुरा मासाजुकाले, कोभिड १९ को नयाँ भेरियन्ट ओमिक्रोन रोकथामका लागि भन्दै जापान सरकारले नवप्रवेशी विदेशीहरुको लागि प्रवेश प्रतिबन्ध गर्नु अवास्तविक भएको बताएका छन् ।

उनले सोमबार, सरकारी निर्णयप्रति आफ्नो बिचार राख्दै, जापानभित्रै ओमिक्रोन बढिरहेको सन्दर्भमा नव प्रवेशीहरुलाई यात्रा प्रतिबन्ध लगाउनु अवास्तविक भएको बताएका हुन् । जापानले गत वर्षको नोभेम्बरमा १ जनामा ओमिक्रोन संक्रमण पुष्टि हुने वित्तिकै नोभेम्बर ३० तारिखबाट नवप्रवेशीहरुको जापान प्रवेश बन्द गर्दै आएको छ । मुलुक भित्रै कोरोना संक्रमण ह्वात्तै बढेपछि प्रतिबन्धलाई लम्ब्याएर फेब्रुअरी अन्त्यसम्म कायम गरेको छ ।

जापान सरकारको पछिल्लो यो निर्णयलाई विदेशी तथा विदेशी समुदायसंग सरोकार राख्ने सबै क्षेत्रबाट बिरोध हुँदै आएको छ । हालसालै विभिन्न मुलुकका जापानी दुतावासहरुमा नव प्रवेशीहरुको यात्रा प्रतिबन्ध गर्नु अवैज्ञानिक भएको भन्दै जापान आउने प्रतिक्षामा रहेकाहरुले बिरोध जनाएको खबरहरु पनि प्रकाशन भएको थियो ।

प्रमुख तोकुराले, यात्रा प्रतिबन्ध अवास्तविक भएको बताउँदै, यस्तो कठिन अवस्थामा गुज्रिरहेको अवस्थामा कर्मचारीहरुको तलब बढाउन प्रधानमन्त्री किसिदाले गरेका आह्वान पनि अव्यबहारिक भएको बताएका थिए । यतिखेर व्यवसाय नै ठप्प प्राय भएकाले प्रधानमन्त्रीले भने जस्तै दिल खोलेर तलब सुविधा बढाउन कठिन रहेको उनको धारणा रहेको थियो ।