टोकियो/जापान।जापान रेलवे कम्पनी( जेआर) ईस्टले टोकियो महानगर भित्र गुड्ने यामानोते लाईनमा पहिलो पटक चालक रहित रेलकोको सफल परिक्षण सम्पन्न गरेको छ ।

विगत ४ वर्षयता निरन्तर विकास र परिक्षणको क्रममा रहेको चालक रहित स्वचालित रेलको यस अघि रातीको समयमा परिक्षण गरिँदै आएको भएता पनि आज भने दिउँसोको समयमा साविकको रेलहरु गुड्ने लाईनमै सफल परिक्षण गरिएको हो ।

जापानमा हरेक वर्ष घट्दो मानव संसाधनलाई मध्ये नजर गर्दै निकट भविष्यमा पुर्णरुपमा संचालनमा ल्याउने योजना सहित निर्माण तथा परिक्षणमा रहेको चालक रहित स्वचालित रेल अव साँच्चै प्रयोगमा ल्याउन योग्य भईसकेको परिक्षणले देखाएको छ ।

आज यामानोते लाईनमा ३४.५ किलोमिटर दुरी करिब १ घण्टाको अवधीमा चालकको साहयता बिनानै संचालन गरिएको हो । जापानी समाचार माध्यमहरुमा प्रकाशित खबरका अनुसार चालक रहित स्वचालित रेलको रोकिने समय तथा स्थान, ढोकाहरु खुल्ने तथा बन्द हुने लगायतका सबै कामहरु स्वचालितरुपमै अपेक्षा अनुसार नै भएको छ । योजना अनुरुप भए सन २०३० देखि स्वचालित रेलहरुले व्यवसायीक यात्रा सुरु गर्नेछन् ।

परिक्षण पश्चात संचारकर्मीहरुले सर्वसाधरणहरुसंग लिएको प्रतिकृयामा भने मिश्रित जवाफ आएको छ । केहि नागरिकहरुले युगको माग भनेका छन् भने केहिले चालक रहित हुँदा निर्धक्क हुन गाह्रो हुने अभिव्यक्ति दिए ।