टोकियो/जापान । जापानले युक्रेनी शरणार्थीहरुलाई स्विकार गर्ने भएको छ ।युक्रेनमा बढ्दो तनावका कारण देश छोडेर अन्यत्र शरण लिनेहरुको संख्या बढिरहेको सन्दर्भमा जापानी प्रधानमन्त्री फुमिओ किसिदाले यस्तो कुरा सार्वजनिक गरेका हुन् ।

बुधबार, पोल्याण्डका प्रधानमन्त्री मास्टुज मोराविएकीसंग टेलिफोन वार्ता गर्नेक्रममा प्रधानमन्त्री किसिदाले,जापानले युक्रेनबाट भागेर आएका जापानमा आफन्त वा चिनजानका मानिस भएका तथा नभएका सबैलाई मानविय अवस्थालाई हेरि प्रवेश दिईने बताएका हुन् । जापानले यसै महिनाबाट नव प्रवेशी विदेशीहरुलाई प्रवेश खुल्ला गरेको छ ।

अहिले जापानले दैनिक ५००० जनासम्म यात्रुहरु मात्रै प्रवेश हुन पाउने व्यवस्था गरेको छ । यद्यपी युक्रेनबाट जापान आउने तथा आउन चाहनेहरुको हकमा यो सिमा लागु नहुने र युक्रेनबाट शरण लिनका लागि आउनेहरुलाई दैनिक तोकिएको ५ हजार जनामा गणना नगरिने पनि प्रधानमन्त्री किशिदाले बताएका छन् ।

युक्रेनमा तनाव बढ्न थालेपछि हालसम्म ८ लाख ७० हजार भन्दा धेरै युक्रेनीहरुले मुलुक छाडी अन्यत्र शरण लिन गईसकेको बताईएको छ । अझै युद्द लम्बिने संकेत गरिएकाले त्यहाँबाट धेरै मानिसहरु अन्यत्र शरणका लागि जान चाहिरहेका छन् ।