टोकियो/जापान । जापान सरकारले आज पहिलो पटक विद्युत अभाव हुने चेतावनी जारी गरेको छ । यहि मार्च १६ तारिखमा गएको ७.४ म्याग्निच्युडको भुकम्पका कारण अझै पुर्णरुपमा विद्युत आपुर्ति सुरु नभईसकेको अवस्थामा मंगल एक्कासी बढेको चिसोका कारण देशभर हिटर तथा तापीय उपकरणहरुको खपत बढ्न गई विद्युत माग कुल आपुर्ति क्षमता भन्दा अधिक भएपछि  यस्तो चेतावनी जारी गरिएको हो ।

आज बिहानैबाट बिजुलीको माग बढ्दै गएको छ । सरकारले टोकियो इलेक्ट्रिक पावर कम्पनीका विद्युत आपुर्ति हुने टोकियो तथा अन्य ८ वटा प्रान्तका घरपरिवार तथा व्यवसायहरूलाई सकेसम्म बिजुली बचत गरी सहयोग गर्न आह्वान गरिरहेको छ ।
माग बढ्दै गई आपुर्ति क्षमता भन्दा अधिक भएमा ओभर लोडका कारण विद्युत आपुर्ति रोकिन सक्नेछ । चिसो संगै वर्षा तथा हिमपात पनि भईरहेकाले वैकल्पिक उर्जाहरुको जोहो पनि हुन नसक्ने भएकाले विद्युत प्रवाहमा समस्या सिर्जना हुनसक्ने आँकलन गरिएको हो ।

जापानले सन २०११ को भुकम्प तथा सुनामी पश्चात विद्युत अभाव चेतावनी जारी गर्न सकिने व्यवस्था कायम गरेको छ । यद्यपी त्यस पश्चात यसरी उपभोक्ताहरुलाई विद्युत अभाव हुनसक्ने चेतावनी जारी गर्नुपरेको थिएन । त्यसो टोकियो ईलेक्ट्रिसिटी पावर कम्पनीले मात्रै नभई तोहोकु ईलेक्ट्रिसीटि पावर कम्पनीले पनि विद्युत खपतमा किफायती गरिदिन आग्रह गरेको छ ।