टोकियो/जापान । हरेक वस्तु तथा सेवाहरुको मूल्य वृद्धि भईरहेको जापानमा अब, रेलको भाडामा पनि महंगी बेहोर्नुपर्ने भएको छ ।

जापानको पूर्वीक्षेत्रमा रेल सेवा संचालन गर्दै आएको प्रमुख रेल कम्पनी जे आर हिगासी निहोनले आउँदो वर्षको वसन्तबाट लागु हुनेगरी, यामानोते लगायतका मुख्य रेलमार्गहरुमा भाडा बढाउने भएको छ । यसरी भाडा बढाउने निर्णय गरेको जेआर हिगासी निहोनले साविकको मूल्यमा १० येन बढाउने बताएको छ । यस्तै मासिक टिकट( 定期券)लिनेहरुले पनि प्रति ६ महिनामा १ हजार ४ सय २० येन बढि तिर्नुपर्नेछ । यानेकी वार्षिक २ हजार ८ सय ४० येन महंगो भाडा तिर्नुपर्ने छ ।

बढेको भाडा सन २०२३ को मार्च देखि कार्यन्वयन हुनेछ । विद्यार्थीहरुको लागि भने भाडा बढ्नेछैन । जे आर हिगासी निहोनले अर्को वर्षबाट भाडा बढाउने योजना र मूल्य सहित आज सरकारलाई औपचारिक जानकारी गराएको हो ।

जेआर हिगासी निहोनले यसरी वृद्धि गरेको भाडा, मानिसहरु रेलमार्गमा खस्नबाट बचाउन प्लेटफर्मको ढोका जडानको कामको लागि प्रयोग गर्नेछ ।जापानका रेलका प्लेटफर्महरुमा बार नहुँदा वर्षेनी सयौँ मानिसहरु झुक्किएर या धकेलिएर रेलमार्गमा खस्न पुगी मृत्युको मुखमा पुग्ने गरेका छन् । खासगरी अत्यन्तै व्यस्थ रहने टोकियाका प्लेटफर्महरुमा यो समस्या अधिक रहेको छ ।