जापान । आज ( जुन ७ तारिख) बिहान होक्काईदोस्थित जेआर चितोसे स्टेशनको क्वाईन लकर ( तोकिएको सिक्का राखेर, आफ्ना सामानहरु राख्न मिल्ने स्टेशनहरुमा रहेको बक्स) भित्र बच्चाको शव फेला परेको छ । अहिले प्रहरीले यस घटनाको विस्तृत अनुसन्धान गरिरहेको छ।

आज बिहान करिब ८:३० बजे, होक्काईदो प्रिफेक्चरको चितोसे सहरको जेआर चितोसे ट्रेम स्टेशनमा अनौठो गन्ध आएपछि सरसफाई कम्पनीले नजिकैको प्रहरीलाई खबर गरिदिएका थिए । जब प्रहरी अधिकारीहरू अनुसन्धान गर्न पुगे, बच्चाको शव स्टेशनको अगाडिको प्रवेशद्वारमा राखिएको क्वाईन लकरमा फेला परेको थियो।प्रहरीका अनुसार क्वाईन लकरमा प्लास्टिकको बक्स भित्र हालेर छाडिएको थियो ।

बिहानको समय चितोसे स्टेशन काम तथा विद्यालयमा आवतजावत गर्ने समय भएकाले निकै व्यस्त समय थियो ।त्यसैले कहिले ? कसले त्यसरी नवजात शिसुको शव राख्यो भन्ने अझै पत्ता लागिसकेको छैन ।

जापानी संचार माध्यमहरुका अनुसार,प्रहरीले मृत्युको कारणबारे अनुसन्धान गर्नुका साथै शव परित्यागको घटना भएकाले वरपरका सुरक्षा क्यामेरा फुटेजहरु हेरि अपराधीको पहिचान गर्ने निर्णय गरेको छ ।