टोकियो/जापान । जापानको एयु/युक्यु तथा पोवो मोबाईल सेवा प्रदायक कम्पनी केडिडिआईले सेवामा देखिएको समस्याको कारण पत्ता लागेको बताएको छ । २ तारिख साँज ५ बजेपछि सार्वजनिक गरेको जानकारी अनुसार डाटा कम्युनिकेशन नेटवर्क प्रयोग गरी भ्वाइस कलमा ट्रान्सफर गर्ने उपकरणमा समस्या आएकाले आज बिहानै देखि सञ्चारमा अवरोध भएको बताईएको छ ।

कारण पत्ता लागेको बताईएपनि अझै, देशैभरका प्रयोगकर्ताहरु टेलिफोन सम्पर्क बाहिर छन् । कम्पनीले साँझ केहि आईफोन तथा एन्ड्रोईड फोनहरुमा ईन्टरनेट सेवा पुन सुचारु भएको बताएको छ । यद्यपी कान्तो क्षेत्रका स्मार्टफोनहरुमा केहि ढिलो गतिमा भएपनि बिहानैदेखि ईन्टरनेट भने चलिरहेको थियो ।

आज दिनैभर तथा अहिलेसम्म पनि एयु, युक्यु,पोवो तथा केडिडिआईको नेटवर्क प्रयोग गर्ने राकुतेनका केहि सेवाहरुमा फोन सम्पर्क नहुने तथा ईन्टरनेट कनेक्सन नहुने समस्या देखिएको छ ।

एन्ड्रोइड फोनहरुमा भने भ्वाइस कलहरू तथा डाटा दुबै संचारहरु प्रयोग गर्न कठिन भएको बताईएको छ । अहिले मर्मतको लागि भार कमगर्न एन्ड्रोईड प्रणालीमा सबै सेवा प्रतिबन्ध लगाइएको बताईएको छ । आज जापानभरका करिब ३ करोडभन्दा बढी केडिडिआईका प्रयोगकर्ताहरु प्रभावित भएका छन् ।