टोकियो/जापान।आर्थिक वर्ष सन २०२३ मा जापानको बजेट हालसम्मकै दोस्रो उच्च रहने संकेत गरेको छ। आगमी आर्थिक वर्षका लागि सरकार समक्ष विभिन्न निकायहरुबाट आएको बजेटको अनुरोधको परिमाण हेर्दा जापानको इतिहासकै उच्च अनुरोध आएको जापानी संचार माध्यमहरुले जनाएका छन् ।

आउँदो अप्रिल महिनादेखि सरुहुने आर्थिक वर्ष सन २०२३ को लागि १ हजार १ सय खर्ब ४८ अर्ब ४० करोड येनबराबरको बजेट अनुरोध आएको बताईएको छ। अर्थमन्त्रालयका अनुसार यस अघि सन २०२२ को आर्थिक वर्ष(चालु आर्थिक वर्ष)का लागि १ हजार ११६ खर्ब ५५ अर्ब ९० करोड येन बराबरको बजेट अनुरोध आएको थियो।

यस पटकको बजेटमा रक्ष मन्त्रालयले विगतका तुलनामा अधिक अनुरोध गरेको छ । जापानको रक्षा बजेट कुल गार्हस्थ्य उत्पादनको १ प्रतिशत रहँदै आएकोमा आगामी आर्थिक वर्ष सन २०२३ को बजेटमा २ प्रतिशत बराबरको माग भएको छ । देशमा रसिया, उत्तरकोरिया तथा चिनियाँ दवाब बढेसंगै जापानी रक्षा मन्त्रालयले आफ्नो प्रतिरक्षा प्रणालीलाई थप मजबुत बनाउन बजेट बढाउन अनुरोध गरेको हो ।

यसका अलवा कोरोना भाईरस महामारीको विरुद्धको उपायहरु अबलम्बन गर्नका लागि थप आर्थिक स्रोत आवश्यक परेको भन्दै प्रायजसो मन्त्रालयहरुबाट साविकको आर्थिक वर्षको तुलनामा अधिक बजेट अनुरोध गरेका छन् । जापानको चालु आर्थिक वर्षको बजेट १ हजार ७५ खर्ब ९६ अर्ब ४० करोड येनको ल्याईएको थियो ।