टोकियो/जापान। जापानको एक सुचना प्रविधि कम्पनी जेन्केनले हालसालै गरेको एक सर्वेक्षण अनुसार जापानका ४५.५ प्रतिशत कम्पनीहरुले विदेशी कामदारहरु भित्र्याउन ईच्छुक भएको नतिजा सार्वजनिक गरिएको छ ।

बढ्दो वृद्ध जनसंख्या र घट्दो जन्मदरका कारण हरेक वर्ष जापानको श्रम बजारमा मानविय संसाधान अभाव खड्किदा गएको छ।यसैविच एक निजी क्षेत्रको कम्पनीले गरेको सर्वेक्षणमा सहभागी कम्पनीहरु मध्ये ४५.५ प्रतिशतले विदेशी कामदार भित्र्याउने ईच्छा व्यक्त गरेको बताईएको छ ।

गत अगस्ट १९ र २१ को बीचमा गरिएको, सर्वेक्षणले २०० कम्पनीहरूबाट वैध प्रतिक्रियाहरू प्राप्त गरेको छ । जसमा सहभागी मध्ये ४२.५ प्रतिशत कम्पनीहरु ५ सय भन्दा कम कामदारहरु भएका थिए भने १५.५ प्रतिशत कम्पनीहरुको १००० जनाभन्दा कम कामदारहरु थिए । त्यस्तै गरि सर्वेक्षणमा सहभागी मध्ये ४२ प्रतिशत कम्पनीहरुमा १००० जनाभन्दा बढि कामदार रहेका थिए ।

यसरी विदेशी कामदारहरूमा रुचि राख्ने कम्पनीहरू मध्ये, ६८.१ प्रतिशत कम्पनीहरुले विदेशी कर्मचारी राख्न चाहनुको मुख्य कारण प्रतिभाशाली कर्मचारीहरूलाई सुरक्षित गर्ने इच्छा भएको बताएका थिए । अन्य कारणहरू बताउने मध्ये ४२.२ प्रतिशतले विदेशी भाषा सीपहरू आवश्यक पर्ने व्यवसाय संचालन गरेको जवाफ दिएका थिए भने,४२.९ प्रतिशत कम्पनीहरुले श्रमिक अभाव भएकाले विदेशी कामदार भित्र्याउन चाहेको बताएका थिए । त्यस्तै लगभग ३० प्रतिशत जतिले उनीहरू आफ्नो विदेशी सम्बन्धहरु बलियो बनाउन वा नयाँ व्यवसायहरू सुरु गर्न चाहने बताएका थिए ।

जापानमा,श्रमशक्ति अभाव हरेक वर्ष बढ्दै जाँदा विदेशी कामदारहरु आपुर्ति गर्नुको विकल्प छैन । यद्यपी व्यवहारिक र कानुनीरुपमा खासै विदेशी कामदार भित्र्याउने प्रकृयामा त्यति उदारता देखाउन नसकिरहेको जापान यहि अवस्था कायम रहे अबको केहि वर्षपश्चात चरम श्रम शक्ति अभावको समस्यामा फस्ने सरोकारवाला निकायहरुको विश्लेषण रहेको छ ।