टोकियो/जापान। जापानको उदाउँदो मोबाईल फोन सेवा प्रदायक कम्पनी राकुतेन मोबाइलका कर्मचारीले ४ अर्ब ६० करोड येन हिनामिना गरेका आशंका संगै कम्पनीका एक व्यवसायिक साझेदार कम्पनी आर्थिक संकटमा परेको छ ।

राकुतेन मोबाईलेले कर्मचारीसँग नजिकको सम्बन्ध भएको व्यवसायिक साझेदारसँगको सम्झौता खारेज गरेपछि, यससँग जोडिएको उप-ठेकेदारको नगद प्रवाह प्रणालीमा समस्या आएको बुझिएको छ ।

गत वर्षको सेप्टेम्बर २ मा राकुतेन मोबाइलले ठगीमा संलग्न भएको अभियोगमा कर्मचारीलाई बर्खास्त गरेको घोषणा गरेको थियो ।सरोकारवालाहरुका अनुसार, कर्मचारीले टोकियोको चियोदामा रहेको निप्पोन लजिस्टिक र मिनातो वार्डमा रहेको ट्रेल नामक दुई लजिस्टिक कम्पनीका कार्यकारीसँग मिलेर परामर्श शुल्कको नाममा राकुतेनमा षड्यन्त्र गरि आर्थिक अपचलन गरेका थिए ।यसरी कर्मचारीसंगको मिलेमतोमा करिब ४ अर्ब ६० करोड आर्थिक अपचलन भएको आशंका गरिएको छ ।

जालसाजी पत्ता लागेको भन्दै, राकुतेनले दुई कम्पनीसँगको लेनदेन रद्द गर्‍यो र बैंक खाता अस्थायी रूपमा जफत गर्न अदालतमा निवेदन दियो र त्यो अदालतबाट स्वीकृत समेत भयो ।