टोकियो/जापान। बागलुङ समाज जापानले नेपालबाट आएका खेलाडीहरुलाई सम्मान तथा भेटघाट कार्यक्रम सम्पन्न गरेको छ । बुधवार टोकियोमा सम्पन्न कार्यक्रममा बागलुङ जिल्ला बडिगाड गाउपालिका स्थित बडिगाड डोजोका प्रमुख प्रशिक्षक राजन कुमार पाईजा,खेलाडी बिज्जल पाईजा र टिम ब्यबस्थापक प्रदिप शाहलाई समाजले सम्मान-पत्र, खादा र मायाको चिनो प्रदान गरी सम्मान गरिएको थियो ।

जापानमा फेब्रुअरी १३ देखि १९ तारिख सम्मको लागि तय भएको कराँते सेमिनार र प्रतियोगितामा सहभागी हुन नेपालको तर्फबाट जापान आएको बखतमा समाजले सम्मान कार्यक्रम गरेको हो ।

राष्ट्रिय तथा अन्तराष्ट्रिय प्रतियोगितामा सहभागी भई पदक जित्न सफल भएका राजन कुमार पाईजा सेमिनारमा सहभागी हुनुहुन्छ भने कराँते खेलाडी बिज्जल पाईजा प्रतियोगितामा सहभागी रहनुभएको टिम ब्यबस्थापक प्रदिप शाहले जानकारी दिए ।

सम्मान कार्यक्रम सचिब बसन्त आचार्यको संचालन, उपाध्यक्ष प्रकाश केसिको स्वागत मन्तब्य र कार्यवाहक अध्यक्ष राजु केसिको सभापतित्वमा सम्पन्न भएको थियो ।