टोकियो/जापान। सन २०४० मा पुग्दा जापानमा करिब १ करोड १० लाख भन्दा बढी कामदारहरुको अभाव हुने विश्लेषण गरिएको छ।

सन २०४० मा हाल मानिँदै आएको बेबी बुम जुनियर पुस्ता( सन १९७१ देखि १९७४ का बिचमा जन्मिएका,हाल शसक्त कार्यक्षमता बोकेका पुस्ता)का मानिसहरु ६५ वर्ष पुग्नेछन्। त्यस पश्चात उनिहरु स्वत सक्रिय कामबाट स्वत विदा हुनेछन्। त्यसपछि जापानमा हरेक वर्ष घट्दो जन्मदरको प्रत्यक्ष प्रभाव देखिने,अनुमान सहित एकैपटक १ करोड १० लाख भन्दा बढि कामदारहरु अभाव हुने विश्लेषण गरिएको हो ।

यो विश्लेषण हालै एक प्रमुख सूचना सेवा कम्पनी रिक्रूटको अनुसन्धान संस्थानले कुल गार्हस्थ्य उत्पादन (GDP)को पूर्वानुमान र लिंग र पुस्ता अनुसार कामदारहरूको प्रतिशतको आधारमा संकलित तथ्यहरुको आधारमा गरेको थियो।

प्रीफेक्चरको आधारमा हेर्दा, टोकियो बाहेक सबै प्रिफेक्चरहरुमा कामदार अभाव देखिनेछ।यस्तो अभावको दर १८ वटा प्रिफेक्चरहरुमा २० प्रतिशतभन्दा बढि रहनेछ।टोकियो लगायतका ठूला सहर र ग्रामीण क्षेत्रमा कामदार अभावको असमान खाडल अझ बढ्नेछ।

जापानलाई ,त्यस समयमा देखिने कामदार अभावको चरम संकट टार्ने बिकल्प भनेको विदेशी कामदारहरुको सहज,व्यवस्थित र ससम्मान प्रवेशको व्यवस्था हो । त्यसैले वर्तमान श्रम मामिलाका सरोकारवाला निकायहरु त्यसतर्फ योजना बनाउनेबारे नीतिगत तहमा छलफलमा जुटेका छन्। उक्त विश्लेषणका आधारमा भन्ने हो भने जापानमा हरेक वर्ष विदेशीहरु कामदारहरुको लागि ठूलो परिमाणमा छिर्न सक्नेगरि ढोका खोल्न जरुरी छ।