टोकियो/जापान। जापानको इबाराकी प्रीफेक्चरल सरकारले सोमबार इबाराकी प्रिफेक्चरको कासामाको पोल्ट्री फार्ममा अत्यधिक संक्रामक एभियन इन्फ्लुएन्जा(बर्ड फ्लु)प्रकोप पुष्टि गरेको छ।

यो सिजनमा जापानमा पुष्टि भएको यो दोस्रो बर्ड फ्लूको प्रकोप हो। यस अघि शनिबार सागा प्रिफेक्चरमा यस वर्षको पहिलो बर्डफ्लु संक्रमण पुष्टि भएको थियो। बर्डफ्लु देखिएपछि फार्ममा रहेका लगभग ७२,००० अण्डा दिने कुखुराहरुलाई नस्ट गर्ने प्रकृया अघि बढाईएको छ।

प्रीफेक्चरल सरकारका अनुसार फार्मले आइतवार बिहान करिब ४५० कुखुरा मरेको बताएको थियो।
त्यस पश्चात एक साधारण भाइरस परीक्षण सकारात्मक नतिजा देखाए पछि, एक विस्तृत आनुवंशिक परीक्षण गरिएको थियो,जसमा उक्त बर्ड फ्लु पुष्टि भएको हो ।

जापानमा गत वर्षको जाडोमा ४७ प्रिफेक्चरमध्ये २६ प्रिफेक्चरका ८४ फार्महरुमा उच्च संक्रामक बर्ड फ्लूको रेकर्ड रिपोर्ट गरेको थियो। जसमा १ करोड ७७ लाख १० हजार कुखुराहरु मारिएको थियो। अघिल्लो वर्ष बर्डफ्लुका कारण उत्पादन हुननसक्दा जापानमा कुखुराको अण्डाको चरम अभाव सिर्जना भएको थियो।

यसले अण्डाको अभाव र मूल्य बढेको छ।

यस सिजनको पहिलो केस शनिबार सागा प्रिफेक्चरको काशिमामा पुष्टि भएको थियो।