टोकियो/जापान । जापानको बेरोजगारी दर गत मे महिनामा पनि २.६ प्रतिशतमा स्थिर रहेको,पछिल्लो सरकारी तथ्यांकले देखाएको छ । २.६ प्रतिशत बेरोजगार कायम भएको यो लगातार चौथो महिना हो ।

श्रम मन्त्रालयको रिपोर्ट अनुसार, मे महिनामा नियमित रोजगार कर्मचारीको संख्या ३ करोड ६७ लाख ५० हजार रहेको छ जसमा १ करोड ३१ लाख ४० हजार महिला रहेका छन् । रोजगार महिलाहरुको संख्या सन २०१३ यताकै उच्च हो ।

मन्त्रालयका एक अधिकारीले नियमित महिला कर्मचारीको वृद्धि उत्पादन र शिक्षा क्षेत्रमा उल्लेख्य रहेको बताए। मेइजी यासुदा अनुसन्धान संस्थानका प्रमुख अर्थशास्त्री युइची कोदामाले भने, “महिला रोजगारीमा भएको वृद्धिले श्रम बजारको कडाईलाई प्रतिबिम्बित गर्दछ।””निरन्तर श्रम अभावको बीचमा, महिलाहरू, विशेष गरी युवा पुस्ता तथा बालबालिका हुर्काउने उमेर समूहका महिलाहरु गैरनियमितबाट नियमित रोजगारीमा स्थानान्तरण भएको छ,” उनले भने।

मे महिनामा रोजगारी भएका व्यक्तिको कुल संख्या
त्यस अघिको महिनाको तुलनामा ०.१ प्रतिशतले बढेर ६ करोड ७६ लाख १० हजारमा पुगेको छ, जबकि बेरोजगारहरूको संख्या ०.५ प्रतिशतले घटेर १८ लाख २० हजार पुगेको मन्त्रालयले जनाएको छ।

ती मध्ये, ७ लाख ५० हजार मानिसहरूले स्वैच्छिक रूपमा आफ्नो जागिर छोडे भने,४ लाख ४० हजार मानिसहरूलाई उनीहरूको रोजगारदाताहरूले जागिर छोडाएका थिए।

समग्रमा,जापानमा कोरोना महामारीको अन्त्यसंगै श्रमिकहरुको माग अत्याधिक बढेको छ। त्यसैले बेरोजगार दर निरन्तर स्थिर रहेको छ। अर्कोतिक श्रमिक अभाव तथा बढ्दो महंगीको मारमा,बालबालिकाहरुको जन्म तथा हेरचाहमा व्यस्त हुनुपर्ने उमेरका महिलाहरु समेत रोजगारीमा व्यस्त हुँदा,जन्मदर थप घट्ने सम्भावना बढाएको छ।