ओसाका/जापान । धादिङ समाज जापान क्षेत्रीय समिति कान्साईको  दोस्रो अधिवेशन आज आईतबार ओसाकामा भव्य र उत्साहपूर्ण वातावरणमा सम्पन्न भएको छ। दोस्रो अधिवेशनले विकास अधिकारीको संयोजकत्वमा नयाँ कार्यसमिति गठन समेत गरेको छ।

संस्थाका वर्तमान संयोजकको सभाध्यक्षता तथा केन्द्रका अध्यक्ष विमल श्रेष्ठको प्रमुख आतिथ्यता रहेको अधिवेशनमा विशिष्ट अतिथिका रूपमा कृष्ण शर्मा गैरे, नरेन्द्र कुमार बस्नेत र श्याम ‘शितल’ श्रेष्ठको उपस्थिति रहेको थियो । यसका साथै जापानको कान्साई क्षेत्रमा क्रियाशील विभिन्न नेपाली संघसंस्थाहरूका प्रतिनिधिहरूको बाक्लो उपस्थिति रहेको थियो । अधिवेशनको संचालन हरिशरण अर्यालले गरेका थिए।

नवगठित समितिमा विकास अधिकारी संयोजकका रूपमा चयन भएका हुन् भने उनको संयोजकत्वमा सन्तोष धिताल   र  विशु गैरे उप–संयोजकका रूपमा चयन भएका छन् । त्यसैगरि हरिशरण अर्याल सचिव तथा कपिल इटनी  सह–सचिव पदमा चयन भएका छन् । नवगठित समितिको कोषाध्यक्ष मा रामकुमार सुवेदी  चयन गरिएको छ भने सह- कोषाध्यक्षमा सुदिप रिमाललाइ   चयन गरिएको  छ ।

सदस्यहरूमा – जानुका सुवेदी,सागर तामाङ,नारायण अधिकारी, सुजन रिमाल,राम बानियाँ र लक्ष्मी जिसी अर्याल चयन  भएको केन्द्रीय महासचिव सुशान्त बानियाँले जानकारी गराएका छन् ।

कार्यक्रममा धादिङ समाज जापानको केन्द्रीय नेतृत्वबाट वरिष्ठ उपाध्यक्ष विजय सडौला, महासचिव सुशान्त बानियाँ, सचिवहरू दीपक बिष्ट र सरोज गिरी, तथा सदस्यहरू सुनिल जमरकट्टेल र भीमसेन कुँवरको पनि उपस्थित रहेको थियो। यसका साथै नव गठित क्षेत्रीय समिति नागोयाका संयोजक सन्तोष भुजेलको समेत सक्रिय उपस्थिति रहेको थियो।

यस अधिवेशनले जापानमा बसोबास गर्ने धादिङवासी नेपालीहरूलाई अझ संगठित र सशक्त ढंगले अगाडि बढाउने लक्ष्य लिएको छ। कार्यक्रमको समापनसहित समाजले आगामी दिनमा विविध सामाजिक, सांस्कृतिक तथा परोपकारी गतिविधिहरूलाई प्राथमिकतामा राख्दै अघि बढ्ने प्रतिबद्धता व्यक्त गरेको छ।