टोकियो /जापान। छोटो भिडियो एप ‘टिकटक’ ले अब जापानमा किनमेल (इ-कमर्स) सेवा सुरु गर्ने तयारी गरिरहेको छ ।यसले अमेजन र राकुतेन जस्ता ठूला अनलाइन बजारहरूलाई सिधा चुनौती दिने संकेत गरेको छ।

यो नयाँ सुविधा खासगरी व्यापार गर्नेहरूका लागि आकर्षक बन्न सक्ने अनुमान गरिएको छ, जसले टिकटकको लोकप्रियता र प्रयोगकर्ताहरूको ध्यान तान्ने क्षमतालाई प्रयोग गरेर आफ्नो उत्पादन बिक्री गर्न सक्नेछन्। यससँगै जापानका चर्चित विज्ञापन कम्पनीहरू हाकुहोदो र डेन्सु जस्ता एजेन्सीहरूले पनि यसलाई एउटा अवसरका रूपमा हेरेका छन्, जसअन्तर्गत उनीहरूले व्यापारीहरूलाई मार्केटिङ र प्रवर्द्धनमा सहयोग गर्न सक्नेछन्।

चिनियाँ कम्पनी बाइटडान्सद्वारा सञ्चालित टिकटकले यसअघि अमेरिका र दक्षिणपूर्वी एसियाका विभिन्न मुलुकहरूमा TikTok Shop सेवा सुरु गरिसकेको छ।

जापानमा भने टिकटकको प्राइभेसी नीतिमा जुन २ तारिखदेखि “किनमेल सुविधासँग सम्बन्धित विवरणहरू” समावेश गरिएको पाइएपछि उद्योग क्षेत्रमा यो सेवा यति छिटै सुरु हुन सक्ने अनुमान गरिएको छ । सम्भवत: यही महिना भित्रै सुरु हुनेछ।

यदि यस्तो सुविधा सुरुआत भयो भने, जापानको इ–कमर्स बजारमा नयाँ ढोका खुल्नेछ र यसले विशेषगरी युवा प्रयोगकर्ताहरूलाई लक्षित गर्दै नयाँ शैलीको किनमेल संस्कृतिको विकास गर्न सक्नेछ।