टोकियो/जापान। जुलाई ३ तारिख बिहानै जापानको ओगासावारा नजिकैको समुद्र क्षेत्रमा ताईफु ३ को देखा परेको छ। हालसम्मको प्रक्षेपणअनुसार यो ताईफु जापानको मुख्यभूमि (होन्स्यु) को पूर्वी समुद्रतर्फ उत्तर दिशामा अगाडि बढ्ने अनुमान गरिएको छ। तर यसको सम्भावित बाटोमा अझै स्पष्टता नआएको हुँदा जापानको मौसम विभागले नागरिकहरूलाई आगामी जानकारीमा ध्यान दिन आग्रह गरेको छ।

जापान मौसम विभागका अनुसार, जुलाई ३ तारिख बिहान ३ बजे ओगासावारा क्षेत्र नजिक ताईफु ३ सुरु भएको हो ।

यस ताईफुको केन्द्रमा वायुचाप १००२ हेक्टोपास्कल रहेको छ भने केन्द्र नजिकैको अधिकतम हावाको गति १८ मिटर प्रति सेकेन्ड र अधिकतम झट्का २५ मिटर प्रति सेकेन्ड मापन गरिएको छ। ताईफुको उत्तरपूर्वतर्फ ३३० किलोमिटर र दक्षिणपश्चिमतर्फ २२० किलोमिटरको भित्रि क्षेत्रमा १५ मिटर प्रति सेकेन्डभन्दा बढी गति भएको कडा हावा चलिरहेको छ।

ताईफु हाल २० किलोमिटर प्रति घण्टाको गतिमा उत्तरपश्चिम दिशामा अगाडि बढिरहेको छ। अनुमान अनुसार यसले जापानको मुख्य भूमि (होन्स्यु) को पूर्वी समुद्रतर्फ उत्तर दिशामा आफ्नो गति राख्नेछ।

तर यसको मार्गको बारेमा अझै निश्चितता नभएकोले, मौसम विभागले सतर्क रहन र आगामी मौसम जानकारीमा ध्यान दिन सबैलाई अनुरोध गरेको छ।