ह्योगो/जापान। जापानको ह्योगो प्रिफेक्चरस्थित निशिनोमिया सहरमा मंगलबार बिहान तीनजनालाई चक्कु प्रहार गरिएको छ। प्रहरीले घटनापछि ३९ वर्षीया एक पुरुषलाई पक्राउ गरेको छ।

स्थानीय प्रशासनका अनुसार, बिहान करिब १० बजे पीडितमध्ये एकजनाले “मलाई भान्सामा प्रयोग हुने चक्कुले हानियो, मेरो हात र ढाडबाट रगत बगिरहेको छ” भनेर आपतकालीन फोन गरेका थिए।

प्रहरी पुगेपछि उनीहरूले घरभित्र बस्ने करिब ९० वर्षका एक पुरुष र ८० वर्षकी उनकी पत्नीलाई घाइते अवस्थामा फेला पारे। साथै, घर नजिकैको सडकमा रहेका करिब ७० वर्षका एक छिमेकी पनि घाइते अवस्थामा भेटिएका थिए। तीनैजना अस्पताल पठाइएका छन् र सबै होसमा रहेको प्रहरीले जनाएको छ।

घटनापछि प्रहरीको खोजतलासमा आक्रमण भएको घरबाट करिब ३०० मिटर टाढा सन्दिग्ध युजी इनोउएलाई पक्राउ गरिएको हो। निशिनोमियाकै बासिन्दा तथा बेरोजगार रहेका उनले भान्साको चक्कु प्रयोग गरी आक्रमण गरेको स्वीकार गरेका छन्। प्रहरीद्वारा उद्धृत भनाइअनुसार, “मार्ने सोच भने ती महिलाप्रति मात्र थियो।”

यो घटना हान्सिन इलेक्ट्रिक रेल्वेको कोशिएन स्टेशनबाट करिब १ किलोमिटर दक्षिणपश्चिमतर्फ रहेको आवासीय क्षेत्रमा भएको हो।