टोकियो/जापान। सन २०२५ को “जापान पावर सिटिज – प्रोफाइलिङ अर्बन एट्र्याक्टिभनेस” र्याङ्किङमा ओसाका लगातार पाँचौं वर्ष पनि जापानका प्रमुख सहरमध्ये पहिलो स्थानमा पर्न सफल भएको छ। यो र्याङ्किङ मोरी बिल्डिङ कम्पनीले मंगलबार सार्वजनिक गरेको हो।

कुल १३६ सहरलाई समेटिएको उक्त सूचिमा नागोया लगातार दोस्रो वर्ष दोस्रो स्थानमा रह्यो भने गत वर्ष पाँचौं स्थानमा रहेको फुकुओका यसपटक उक्लिँदै तेस्रो स्थानमा पर्न सफल भयो।

ओसाकाले “अर्थतन्त्र र व्यवसाय” तथा “पहुँच सहजता” दुई विधामा उच्च स्थान हासिल गर्यो। साथै, सन् २०२५ मा हुने ओसाका-कान्साई एक्स्पोको तयारी स्वरूप गरिएको पूर्वाधार विकास र होटल निर्माणले पनि यसको मूल्याङ्कनलाई बलियो बनाएको छ।

नागोयाले “अनुसन्धान तथा विकास” र “दैनिक जीवन र बसाइयोग्यता” क्षेत्रमा उच्च अंक पाएको छ। उता, फुकुओकाले चीन र दक्षिण कोरियासँगको नजिकको भौगोलिक अवस्थालाई उपयोग गर्दै पर्यटन प्रवर्द्धनजस्ता पहलमार्फत आफ्नो अंक सुधार गरेको हो।

त्यसैबीच, गत वर्ष तेस्रो स्थानमा रहेको योकोहामा यसपटक चौथो स्थानमा झरेको छ। बसोबास र जीवनयापन लागतसम्बन्धी सूचकमा यसको मूल्याङ्कन घटेको देखिएको छ।

यो वार्षिक र्याङ्किङ मोरी मेमोरियल फाउन्डेसनको इन्स्टिच्युट फर अर्बन स्ट्राटेजीजले तयार गर्ने गर्दछ। छनोटका लागि सरकारी तोकिएका सहर, प्रिफेक्चर कार्यालय रहेका सहर तथा १ लाख ७० हजारभन्दा बढी जनसंख्या भएका सहरलाई आधार मानिन्छ। राष्ट्रिय तथ्यांक र बासिन्दा सर्वेक्षणमार्फत “अर्थतन्त्र र व्यवसाय”, “दैनिक जीवन र बसाइयोग्यता” लगायत ६ विधामा रहेका ८७ सूचकाङ्कमा आधारित मूल्याङ्कन गरेर स्थान तोकिएको हो।