टोकियो/जापान। टोकियो महानगर सरकारले जापान एयरलाइन्स र नोमुरा रियल इस्टेट डेभलपमेन्ट नेतृत्वमा दुई टोलीलाई “फ्लाइङ कार” (उड्ने सवारी) परियोजनाका लागि चयन गरेको छ।

टोकियोको यो महत्वाकांक्षी योजना अन्तर्गत जापान एयरलाइन्स (JAL) समूहमा नौ कम्पनीहरू छन् — जसमा सुमितोमो कर्पोरेशन, ताइसेई कर्पोरेशन, र केइओ कर्पोरेशन पनि सामेल छन्। उनीहरूले अमेरिकास्थित आर्चर एभिएशन कम्पनीका उड्ने सवारी प्रयोग गर्ने योजना बनाएका छन्।

नोमुरा रियल इस्टेट डेभलपमेन्टको नेतृत्वमा रहेको अर्को समूहमा सात कम्पनीहरू छन्, जसमा एएनए होल्डिङ्स ,ईस्ट जापान रेलवे कम्पनी र सेइबु होल्डिङ्स  पनि छन्। यस समूहले टोयोटा, आइची प्रिफेक्चरमा आधारित स्काइड्राइभ (SkyDrive Inc.) र अमेरिकी कम्पनी जोबी एभिएशन (Joby Aviation Inc.) का विमान प्रयोग गर्नेछ।

यी टोलीहरूले टोकियोका तटीय क्षेत्र र तामा नदी आसपासको हवाई मार्गमा परीक्षण उडान गर्ने योजना बनाएका छन्। परीक्षण उडानहरू आगामी आर्थिक वर्षभित्र सञ्चालन गरिनेछ र सन् २०२७ आर्थिक वर्षभित्र आंशिक व्यावसायिक सेवा सुरु गर्ने लक्ष्य राखिएको छ। पूर्ण रूपमा व्यावसायिक सञ्चालन सन् २०३० आर्थिक वर्षभित्र सुरु गर्ने लक्ष्य लिइएको छ।