हिरोशिमा,जापान। जापानको हिरोशिमा प्रिफेक्चरले आफ्नो इतिहासमै पहिलोपटक महिला गभर्नर चयन गरेको छ। पूर्व उप–गभर्नर मिकाको योकोता आइतबार सम्पन्न गभर्नर निर्वाचनमा विजयी भइ हिरोशिमाकी पहिलो महिला गभर्नर बनेकी हुन्।

५४ वर्षीया योकोता स्वतन्त्र उम्मेदवारका रूपमा प्रतिस्पर्धामा उत्रिएकी थिइन्। उनलाई सत्तारूढ लिबरल डेमोक्रेटिक पार्टी सहित संविधानिक डेमोक्रेटिक पार्टी, डेमोक्रेटिक पार्टी फर द पिपल्स र कोमेतो पार्टीको समर्थन प्राप्त थियो।

उनले ६४ वर्षीया मायुमी इनोहारालाई पराजित गरिन्, जो जापानी कम्युनिस्ट पार्टीद्वारा समर्थित उम्मेदवार थिइन्। इनोहारा न्यू जापान वुमेन्स एसोसिएसनको हिरोशिमा शाखाकी अधिकारी हुन्।

निर्वाचन प्रचारका क्रममा योकोताले पूर्व गभर्नर हिदेहिको युजाकी (६०) को नीतिलाई निरन्तरता दिने बताएकी थिइन्। युजाकीले लगातार चार कार्यकाल पूरा गरी पदत्याग गरेका हुन्।

योकोताले युवाहरू र महिलाहरूका लागि आकर्षक समुदाय निर्माण गर्ने, साथै कृषि, वन र मत्स्य क्षेत्रको उत्पादन वृद्धि गर्ने प्रतिबद्धता जनाएकी थिइन्।