जापान। दक्षिण चीन सागरमा सक्रिय ताईफु नम्बर–२६ उत्तरतर्फ सर्दै ओकिनावा नजिक आईपुगेको छ । यस ताईफुको प्रभावले जापानको ओकिनावा प्रान्तमा बुधबार (१२ नोभेम्बर) सम्म भीषण वर्षा, ठूलो हावा र उच्च छालको जोखिम बढाएको जापान मौसम विभागले जनाएको छ।

मंगलवार बिहान ६ बजेसम्मको अवस्थाअनुसार ताईफु दक्षिण चीन सागरमा उत्तर–उत्तरपश्चिम दिशातर्फ बढिरहेको छ । यसको केन्द्रको वायुचाप ९७५ हेक्टोपास्कल रहेको छ भने केन्द्र नजिक अधिकतम स्थायी हावा गति ३० मिटर प्रति सेकेन्ड र क्षणिक अधिकतम गति ४५ मिटर प्रति सेकेन्ड पुगेको छ ।

मौसम विभागका अनुसार ताईफु १२ नोभेम्बरसम्म उत्तरतर्फ सर्दै ताइवान नजिक पुग्ने अनुमान गरिएको छ । यसै क्रममा ओकिनावा क्षेत्रमा ताईफुबाट आउने हावा प्रवेश गरिरहेकाले वायुमण्डल अत्यन्त अस्थिर बनेको छ । योङागुनी विमानस्थल क्षेत्रमा बिहान ६:३० सम्मको एक घण्टामा ३४ मिलिमिटरको तीव्र वर्षा मापन गरिएको छ ।

मौसम विभागले जनतामा अत्यधिक सतर्कता अपनाउन आग्रह गरेको छ ।ताईफु १३ नोभेम्बर तिर ताइवान नजिक पुग्दा केही कमजोर भई कमचापमा रूपान्तरण हुने अनुमान गरिएको छ । त्यसपछि यो साकिशिमा टापु नजिक पुग्ने सम्भावना छ, जसका कारण त्यहाँ र ओकिनावा मुख्य टापुमा अझै तीव्र वर्षा र समुद्र अशान्त रहने देखिएको छ ।