टोकियो,जापान। जापानमा चिसो हावाको प्रभाव झन् कडा बन्दै गएपछि होक्काइदोदेखि होकुरिकु क्षेत्रमा विशेष गरी पहाडी भेगमा उल्लेखनीय हिमपात भएको छ। मौसम विज्ञान एजेन्सीका अनुसार ५ तारिखसम्म पनि हिमपात र वर्षा बीच-बीचमा जारी रहने र कतै-कतै फेरि तीव्र हिमपात हुने सम्भावना रहेको छ, जसका कारण यातायातमा अवरोध बढ्न सक्ने चेतावनी दिइएको छ।

मौसम विभागले जनाएको अनुसार जापान वरपर अत्यन्तै चिसो हावा प्रवेश गर्दै गएपछि हावाको शीत–प्रणाली बलियो बनेको छ। यसकै प्रभावमा जापान सागर तिरका पहाडी क्षेत्रमा हिउँको मात्रा एकैदिनमा उल्लेखनीय रूपमा बढेको पाइएको छ।

४ तारिख साँझ ५ बजेसम्म आओमोरी प्रिफेक्चरको सुकारायु क्षेत्रमा ९६ सेण्टिमिटर, फुकुसिमा प्रिफेक्चरको हिएदाकिमा ५० सेण्टिमिटर र गुन्मा प्रिफेक्चरको मिनाकामी- फुजिवारामा ३५ सेण्टिमिटर हिमपात मापन गरिएको छ। यी क्षेत्रहरूमा अझै हिमपात जारी रहने अनुमान गरिएको छ।

जापानका क्योतो, वाकायामा तथा शिमोनोसेकी (यामागुची) मा पनि पहिलो हिमपात सुरु भएको छ। यस वर्ष यस्ता प्रारम्भिक हिमपातले चिसो मौसम अब छिट्टै स्थिर रूपमा सुरु हुन लागेको संकेत गरेको बताइन्छ।

४ तारिखको बिहान जापानभरको तापक्रम यस सिजनकै सबैभन्दा कम बिन्दुमा झरेको थियो। होक्काइदोको कामिशिहोरोमा –१३.५°C, हिरोशिमाको फुकुयामामा –०.६°C, ओसाकामा ३.२°C र टोकियोको मध्य क्षेत्रमा ४.५°C मापन गरिएको छ। यी तापक्रमहरूले चिसोको प्रभाव निकै गहिरो रूपमा फैलिएको देखिन्छ।

दिउँसो तापक्रम नबढेकाले साँझ ६ बजेसम्म जापानभरका २०० भन्दा बढी स्थानमा ‘माफ्युबी’ (真冬日) अर्थात् दिनभर तापक्रम ० डिग्री सेल्सियसभन्दा माथि नपुग्ने मध्य जाडो दिनकोरुपमा दर्ता भएको छ। यसले उत्तरी तथा पूर्वी जापानमा कडा जाडो सक्रिय रूपमा सुरु भइसकेको संकेत गरेको छ।

आगामी दिनको पूर्वानुमान अनुसार शीत–प्रणाली केही कमजोर हुँदै गए पनि ५ तारिखसम्म उत्तरी र पूर्वी जापानका पहाडी क्षेत्रमा हिउँ र वर्षा जारी रहनेछ। कतै–कतै तीव्र हिमपात हुने भएकाले यात्रा, सडक तथा हवाई यातायातमा प्रभाव पर्नसक्ने बताइएको छ।

देशभर विशेष गरी समुद्री क्षेत्रहरूमा हावा बलियो बहने र उच्च छाल आउने सम्भावना रहेको छ। जहाज आवागमन तथा समुद्री गतिविधिमा जोखिम बढ्नसक्ने भएकाले सावधानी अपनाउन सुझाव दिइएको छ।

५ तारिखको न्यूनतम तापक्रम साप्पोरोमा –३°C, साईतामा तथा मितोमा –२°C, निगातामा ०°C र टोकियो तथा नागोयामा ३°C रहने अनुमान गरिएको छ। यसले कडा जाडो अझै केही दिन सक्रिय रूपमा रहने संकेत गर्दछ।

मौसम एजेन्सीले सडकमा हिउँ जमेर चिप्लिने तथा यातायात अवरुद्ध हुने जोखिमप्रति अत्यधिक सतर्कता अपनाउन आग्रह गरेको छ। साथै, बलियो हावा, उच्च छाल, घरका छानाबाट हिउँ खस्ने, बिजुलीका तारमा हिउँ जमेर विद्युत अवरोध हुने र हिमपहिरोको जोखिम पनि उच्च रहने बताइएको छ।