टोकियो,जापान। जापानमा गत वर्ष आत्महत्या गर्ने कुल व्यक्तिको संख्या घटे पनि बालबालिका तथा विद्यार्थीको संख्या भने अहिलेसम्मकै उच्च पुगेको छ। स्वास्थ्य, श्रम तथा कल्याण मन्त्रालयका अनुसार गत एक वर्षमा आत्महत्या गरेका बालबालिका तथा विद्यार्थीको अस्थायी तथ्यांक ५३२ पुगेको छ, जुन सन १९८० यता राखिएको तथ्यांकमध्ये सबैभन्दा धेरै हो।

उमेर समूहअनुसार हेर्दा उच्च माध्यमिक तहका विद्यार्थी माध्यमिक तहका १७० र प्राथमिक तहका १० जना रहेका छन्। यस अवधिमा विशेषगरी महिला माध्यमिक तथा उच्च माध्यमिक तहका विद्यार्थीमा आत्महत्याको संख्या बढी देखिएको मन्त्रालयले जनाएको छ। सन् २०२० मा तीव्र रूपमा बढेपछि यो प्रवृत्ति निरन्तर रहँदै आएको बताइएको छ।

१९ वर्षभन्दा कम उमेरका व्यक्तिमा आत्महत्याको कारण हेर्दा पढाइमा कमजोर नतिजा र भविष्यको करियरप्रतिको चिन्तासँग जोडिएको ‘विद्यालयसम्बन्धी समस्या’ सबैभन्दा प्रमुख कारण बनेको छ। त्यसपछि मानसिक स्वास्थ्यसम्बन्धी समस्या, जस्तै डिप्रेसन, अर्को मुख्य कारणका रूपमा देखिएको छ।

बालबालिका तथा विद्यार्थीको आत्महत्या बढ्दै गएपछि सरकारले कारणको गहिरो विश्लेषण गर्दै सामाजिक सञ्जालमार्फत परामर्श सेवा विस्तारलगायतका कदमहरूलाई थप बल दिएको जनाएको छ।

यसैबीच, सबै उमेर समूह समेट्दा गत वर्ष आत्महत्या गर्ने कुल संख्या १९ हजार ९७ रहेको छ, जुन अघिल्लो वर्षको तुलनामा १ हजार २ सय २३ ले कम हो। सन् १९७८ देखि तथ्यांक राख्न थालिएयता पहिलोपटक कुल संख्या २० हजारभन्दा तल झरेर अहिलेसम्मकै न्यूनतम भएको मन्त्रालयले जनाएको छ।

लिङ्गका आधारमा हेर्दा पुरुष १३ हजार १ सय १७ र महिला ५ हजार ९ सय ८० रहेका छन्। सबै उमेर समूहमा आत्महत्याको प्रमुख कारण स्वास्थ्यसम्बन्धी समस्या, त्यसपछि आर्थिक तथा जीवनयापनका समस्या र पारिवारिक समस्या रहेको मन्त्रालयले स्पष्ट पारेको छ।