टोकियो। जापानलाई कर्मथलो बनाउँदै आएकी  गायिका बाला दुराले लोकलयमा आधारित नयाँ दोहोरी गीत ‘लमजुङे स्वल्टिनी’ सार्वजनिक गरेकी छन्। उक्त म्युजिक भिडियो हालै उनले आफ्नै युट्युब च्यानलमार्फत दर्शक तथा स्रोतामाझ ल्याएकी हुन्।

गीतमा गायिका दुरालाई गायक मौसम गुरुङले स्वरमा साथ दिएका छन्। म्युजिक भिडियोमा गणेशमान घले, रजनी गुरुङ, मनोज गुरुङ र सिञ्जो दुराको अभिनय देख्न सकिन्छ।

वरिष्ठ सर्जक शिव हमालको शब्द र मौसम गुरुङकै संगीतमा तयार गरिएको ‘लमजुङे स्वल्टिनी’ मा तन्नेरी जोडीबीचको गहिरो माया र प्रेमलाई आकर्षक लोकलयमा प्रस्तुत गरिएको छ। सशक्त शब्द संयोजन, मिठासपूर्ण स्वर र सुमधुर संगीतले सजिएको यस गीतले दर्शक तथा स्रोतामाझ राम्रो प्रतिक्रिया पाउने अपेक्षा गरिएको छ।

राष्ट्रिय लोक तथा दोहोरीगीत प्रतिष्ठान जापान शाखाकी प्रवक्ता समेत रहेकी गायिका दुरा लाइभ दोहोरीमा पनि उत्तिकै सक्रिय र लोकप्रिय मानिन्छिन्। लमजुङको सांगीतिक माटोमा जन्मिएकी उनले आफ्नै लगानीमा तयार पारेको यस गीतलाई सुनेर, हेरेर तथा सब्स्क्राइब गरेर सहयोग गर्न सबै संगीतप्रेमी नेपालीहरूसँग आग्रह गरेकी छन्।

गायिका दुराले आफ्नो सांगीतिक यात्रा ‘सुन्दरबजार सत्रसय फाँट’ गीतबाट सुरु गरेकी थिइन्। त्यसयता तीज गीत, सालैजो तथा मौलिक एकल र दोहोरी गरी करिब एक दर्जन एल्बममा उनले आफ्नो स्वर दिइसकेकी छन्।