टोकियो। “विश्वका सबै बालवालिकाहरु एकत्रित होऔँ”(みんな集まれ 世界の子ども) भन्ने नाराका साथ, अल जापान सोसाईटी कन्ट्रिब्युसन संगठनद्वारा आयोजित “चाईल्ड आर्ट फेस्टिवल” शनिबार टोकियोको योचुया सानच्योमेमा सम्पन्न भएको छ ।

चित्रकलाको माध्यमबाट विश्वका बालबालिकाहरुलाई एकत्रित गरी,उनिहरुद्वारा कोरिएका चित्रहरु मार्फत एक अर्कालाई बुझी,साथी बनाई देश र धर्म संस्कृतीको घेरा भन्दा माथी उठेर अन्तर्राष्ट्रिय बुझाईको प्रवर्द्धन र विश्व शान्ति स्थापना गर्ने उदेश्यका साथ,सन २००८ देखि यो फेस्टिवल सुरु गरिएको हो । हरेक वर्ष जापान र कुनै अर्को एक मुलुकका बालबालिकाहरुलाई समेट्ने चित्रकलामा,प्रतियोगितात्मक भन्दा पनि सहभागी र सदभाव मुलक बनाउने प्रयत्न गरिन्छ ।

हाल सम्म,भियतनाम,कोरिया,भारत,नेपाल,थाईल्याण्ड,चीन तथा ईन्डोनेशिया लगायतका मुलुकका बालबालिकाहरु बीच चित्रकलाको आदनप्रदान गरिसकेको संस्थाको रिपोर्टमा देखिन्छ । यस पटक देशगत रुपमा ईन्डोनेशिया र जापानका बालबालिकाहरु समेटिएको भए पनि,आयोजनाको १० औँ वर्षगाँठको अवसर भएकाले जापानमा विशेष कार्यक्रम सहित “चाईल्ड फेस्टिवल”आयोजना गरिएको हो ।

टोकियोको योचुयामा आयोजित कार्यक्रमलाई ३ खण्डमा विभाजन गरीएको थियो,जसमा (डान्स एण्ड सिंग) नाचगान खण्डमा,नेपालीहरुद्वारा सञ्चालित एभरेस्ट स्कुलका बालबालिकाहरुले पनि नेपाली लोक नृत्य प्रस्तुत गरेका थिए । मेलामा नेपाली समुदायको संयोजन सरद गौचनले गर्नुभएको थियो ।