क्योटो, जापान । डिमेन्सिया पीडित एक ९६ वर्षीया वृद्धाको बैंक कार्ड र पासबुक ठगी गरेको आरोपमा क्योटो प्रहरीले एक पूर्व प्रहरी अधिकारीसहित दुई जनालाई पक्राउ गरेको छ। पक्राउ पर्नेमा क्योटो प्रिफेक्चरल प्रहरीका पूर्व अधिकारी र अर्का एक कम्पनी कर्मचारी रहेका छन्। ति व्यक्तिले डिमेन्सिया भएका वृद्ध नागरिकलाई सहयोग पुर्‍याउने भन्दै पूर्व प्रहरी कर्मचारीहरू मिलेर स्थापना गरेको एक समूहको बोर्ड सदस्यसमेत हुन् ।

प्रहरीका अनुसार यो घटना मार्च ७ मा भएको हो।उनिहरुले “हाम्रो समूहले तपाईँको पैसा सुरक्षित रूपमा व्यवस्थापन गर्छ” भन्दै वृद्धाको बैंक कार्ड र पासबुक लिए। यस समूहले प्रहरीद्वारा संरक्षणमा राखिएका डिमेन्सिया पीडितलाई परिवारकै प्रतिनिधि बनेर ल्याउने–पुर्‍याउने तथा दैनिक सहायता गर्ने सेवा प्रदान गर्दै आएको छ। तर, यसै समूहका बोर्ड सदस्य र पूर्व प्रहरी अधिकारी नै ठगीमा संलग्न देखिनुले प्रश्न उठाएको प्रहरीले जनाएको छ।

प्रहरीले दुवैले वृद्धाको बैंक कार्ड प्रयोग गरी कयौँ लाख जापानी येन निकालेको शंका गरेको छ। समूहले आफ्नो वेबसाइटमार्फत “प्रहरीको सहकार्यमा वरिष्ठ नागरिकलाई सुरक्षित र भरपर्दो वातावरण सिर्जना गर्ने” प्रतिवद्धता जनाए पनि व्यवहारमा उल्टो गतिविधि भएको भेटिएको प्रहरीको भनाइ छ।

पक्राउ परेका मध्ये एक जना यसअघि क्योटो प्रहरीको चोरीसम्बन्धी शाखामा कार्यरत थिए। सन २०२३ को वसन्तमा अवकास लिएपछि उनले अर्को पूर्व प्रहरी अधिकारीसँग मिलेर यो सहायतामूलक समूह स्थापना गरेका थिए।

यो घटना वृद्धाका परिवारजनले रकम शंकास्पद रूपमा हराएको देखेपछि जून महिनामा प्रहरीसँग सम्पर्क गर्दा बाहिर आएको हो। क्योटो प्रहरीले दुवै अभियुक्तमाथि थप अनुसन्धान गरिरहेको छ।