काठमाडौं । राष्ट्रिय पुनर्निर्माण प्राधिकरणले बनिसकेका घरको नक्सासम्बन्धी विषयमा असुविधालाई तत्काल सहजीकरण गर्न निर्देशन दिएको छ । कतिपय गाउँपालिका तथा नगरपालिकाहरूले भूकम्पपीडितहरूलाई दोस्रो वा तेस्रो किस्ता रकम लिन जाँदा बनिसकेका घरको नक्सासम्बन्धी विषयमा अप्ठ्यारो पार्ने गरिएको गुनासो आएपछि प्राधिकरणले सम्बन्धितलाई उक्त निर्देशन दिएको हो ।

प्राधिकरणले स्थानीय तहका प्रतिनिधिसँगको बैठकमा नक्सासम्बन्धी अप्ठ्यारालाई स्थानीय तहकै सम्बन्धित गाउँपालिका र नगरपालिकाहरूले सहजीकरण गरी फरफारकमा सघाउ पुर्‍याउन निर्देशन दिएको हो । बैठकले निजी आवास निर्माणमा ठूलो सङ्ख्यामा सिकर्मी तथा डकर्मी परिचालन गर्नुपर्ने देखिएकाले तालीम प्रदान गर्ने विभिन्न निकायसँग छलफल गरी आगामी पुस मसान्तभित्रै सबै तालीम सम्पन्न गर्ने व्यवस्था मिलाउनेसमेत निर्णय गरेको छ ।

प्राधिकरणले भूकम्पबाट अतिप्रभावित १४ जिल्लाका प्रत्येक गाउँपालिका तथा नगरपालिकाको प्रत्येक वडामा कम्तीमा १ जना प्राविधिक इञ्जिनीयर, सबइञ्जिनीयर, असिष्टेण्ट सबइञ्जिनीयर, कम प्रभावित १७ जिल्लामा लाभग्राहीको सङ्ख्याअनुसार पर्याप्त हुने गरी प्राविधिक खटाउने व्यवस्था मिलाउन शहरी विकास मन्त्रालयअन्तर्गतको केन्द्रीय आयोजना कार्यान्वयन इकाइलाई निर्देशन दिएको छ । त्यसका लागि १ प्राविधिकलाई बढीमा ५ सय लाभग्राही हेर्ने गरी परिचालन गराउने तयारी गरिएको प्राधिकरणका प्रवक्ता यमलाल भुसालले बताए ।

प्राधिकरणबाट स्थानीय तहमा खटिई आउने प्राविधिकहरूलाई कामकाज सहज गर्न गाउँपालिका तथा नगरपालिकाले व्यवस्था गर्ने र कम्तीमा १ जना सामाजिक परिचालक खटनपटन गर्न अत्यन्तै आवश्यक भएकोले त्यसको व्यवस्थापनका लागि पहल गर्ने प्राधिकरणले बताएको छ ।