काठमाडौं, वैशाख ७ । मधेसी मोर्चामा आवद्ध पाँच पार्टीबीचको एकताको औपचारिक घोषणा बिहीबार हुँदैछ । पाँच पार्टी मिलेर बनेको राष्ट्रिय जनता पार्टी (राजपा) अब मधेसको सबैभन्दा बढी सीट भएको पार्टी ठहरिएको छ ।
नयाँ दल राजपामा महन्थ ठाकुर नेतृत्वको तमलोपा, राजेन्द्र महतो नेतृत्वको सदभावना पार्टी, शरदसिंह भण्डारीको राष्ट्रिय मधेस समाजवादी पार्टी, महेन्द्र यादव नेतृत्वको तराई मधेस समाजवादी पार्टी र राजकिशोर यादव नेतृत्वको फोरम गणतान्त्रिक आवद्ध भएका छन् । अनिल झा नेतृत्वको नेपाल सद्भावना पार्टीई पनि एकता प्रक्रियामा सामेल गर्ने प्रयास भइरहेको नेताहरुले बताएका छन् ।
बुधबार राति एक बजेसम्म भएको डिनरसहितको छलफलले पार्टी एकताको टुंगो लगाएको हो । एकताको घोषणा ब्हिीबार अपरान्ह डिल्लीबजारस्थित अमृत भोग पार्टी प्यालेसबाट गर्न लागिएको नेता राजकिशोर यादवले जानकारी दिए । पार्टी एकता भएपछि तराई मधेसका विभिन्न जिल्लामा ब्याण्ड बाजासहित उत्सव मनाउन र बिहीबार साँझ दिपावली गर्न नेताहरुले जिल्लाका कार्यकर्तालाई निर्देशन दिएका छन् ।
एकता हुने पक्का भएसँगै मधेसमा अस्थित्वमा रहेका मधेस केन्द्रित दलहरुमध्ये संसदमा प्रतिनिधित्वका आधारमा राजपा सबैभन्दा ठूलो दल बनेको छ । अब संसदमा यो दलको सीट संख्या २३ पुगेको छ । हाल संसदमा तमलोपाको ११ सीट छ भने सदभावनाको ५ सीट छ । रामसपा र तमसपाको ३र३ सांसद छन् भने गणतान्त्रिक फोरमको १ सीट छ । यो सबै जोड्दा अब नयाँ पार्टी २३ सीटको बनेको छ ।