काठमाडौं, २६ पुस । स्वास्थ्य अवस्थामा समस्या देखिएपछि वीर अस्पतालमा भर्ना गरिएका डा. गोविन्द केसीलाई सर्वोच्च अदालत लगेर बहस सुरु गरिएको छ । अदालतको अवहेलनासम्बन्धी मुद्दामा बहस सुरु भएको हो ।
केसीको पक्षबाट बहस गर्न सय जना अधिवक्ताहरूले वकालतनामा दिएको केसीका वकिल सुरेन्द्र भण्डारीले जानकारी दिए ।

अनशनमा बसेका केसीलाई अदालतको अवहेलना गरेको भन्दै सोमबार राति पक्राउ गरेर हिरासतमा राखेको थियो । मंगलबार पनि दिनभर उनलाई सर्वोच्चमा उपस्थित गराएर बयान लिइएको थियो । बेलुका उनको स्वास्थ्यमा केही समस्या देखा परेपछि वीर अस्पतालमा भर्ना गरिएको थियो ।

८ घण्टासम्म अदालतमा रहेका केसीले आफ्नो बयानमा पनि प्रधान न्यायाधीशमाथि नै अनुसन्धान गर्नुपर्ने र उनैले नै अदालतको अवहेलना गरेको बताएका छन् ।
यसैबीच केसीको समर्थनमा जुलुस निस्कन सक्ने आशंका गर्दै सरकारले आज सिंहदरबार वरिपरीको सुरक्षा व्यवस्था कडा पारेको छ । न्यायाधीश पुरूषोत्तम भण्डारी र वमकुमार श्रेष्ठको इजलासको पहिलो नम्बरमा पेसी तोकिएको छ ।