ललितपुर, १६ बैशाख । बीबीसीका रबिन्द्र मिश्रबाट भर्खरै स्थापित साझा पार्टीले आसन्न स्थानिय निकायको चुनावका लागि ललितपुरमा मेयर र उपमेयरको उमेदवारी घोषणा गरेको छ ।
साझाले केन्द्रीय संयोजन समितिका सदस्य रमेश महर्जन तथा शोभा शाक्यले ललितपुर महानगरपालिकाको मेयर तथा उपमेयरका लागि स्वतन्त्र उमेदवारी घोषणा गरेका छन् । रत्न पेशाले सुनचाँदी व्यवसायी हुन् । उनी नेपाल सुनचाँदी रत्न तथा आभुषण महासंघका अध्यक्ष तथा नेपाल चेम्बर अफ कमर्सको कार्य समितिका सदस्य पनि हुन् । पाटनको रूद्रवर्ण महाविहार परिसरमा जन्म भएकी ५४ वर्षीय शोभा शाक्य पनि धार्मिक तथा सामाजिक कार्यमा भिजेकी छिन् । बुवा बहादुर शाक्यबाट असल नेतृत्व क्षमता सिकेको बताउने शाक्य हाल शाक्यसिंह विहारकी उपाध्यक्ष छिन् । शाक्यले पाटन औद्योगिक क्षेत्रमा रहेको आफ्नो उन तथा हस्तबुनाई कारखानामा ५०० भन्दा बढी महिला कामदारलाई रोजगारी दिएकी छिन् । महिला उत्थानमा सानैदेखि गहिरो भावना राख्ने शाक्यले ठैना महिला समूह जस्ता कैयन संस्था मार्फत महिलाको सशक्तिकरण तथा उद्यम विकासमा ठुलो योगदान पुर्याएकी छिन् ।