काठमाडौं, १३ जेठ । काठमाडौं महानगरपालिकाको मेयरमा नेकपा एमालेका विद्यासुन्दर शाक्य विजयी भएका छन् ।
महानगरमा हालै भएको अन्तिम नतिजा अनुसार नेकपा एमालेका उम्मेदवार विद्यासुन्दर शाक्यले ६४ हजार ९ सय १३ मत ल्याएर विजयी भएका छन् । निकटतम् प्रतिद्वन्द्वी नेपाली कांग्रेसका राजुराज जोशीले ४५ हजार २ सय ६९ मत ल्याएका छन् । यस्तै विवेकशील नेपाली दलकी रञ्जु दर्शनाले २३ हजार ४ सय ३९ मत ल्याइन् । साझा पार्टीका किशोर थापाले १८ हजार ६ सय ९६ मत ल्याए । यस्तै उपमेयर तर्फ नेपाली कांग्रेसकी हरिप्रभा खड्गी विजयी भइन् । उनले ५८ हजार ९ सय ५३ मत ल्याएर विजयी भएकी हुन्। उनकी निकट्तम प्रतिस्पर्धी राप्रपाका राजाराम श्रेष्ठले ३४९५४ मत ल्याए । यस्तै साझा पार्टीकी उम्मेद्वारले ११ हजार ५ सय ३३ मत ल्याइन् । शाक्य काठमाडौं महानगरपालिकाको तेस्रो मेयर निर्वाचित भएका हुन् । काठमाडौंकै पूर्वमेयर केशव स्थापितका योजना र महानगर सपना विद्यासुन्दरका सम्पत्ति हुन् । चुनावी दौरानका क्रममा स्थापितले उनलाई काँधमा बोकेरमात्र हिँडेनन् । चुनावी अभियानको सारथी नै बने । अबको महानगर निर्माणमा आफ्ना अग्रज केशव स्थापितको सहयोग र महानगरका संस्थापक मेयर पीएल सिंहको सद्भाव आफूलाई रहने विश्वास विद्यासुन्दरले व्यक्त गरेका छन् ।