काठमाडौं, १३ असार । निर्वाचन आयोगले बुधबार तीन वटा प्रदेशमा हुने दोस्रो चरणको निर्वाचनको सम्पूर्ण तयारी पुरा भएको र सुरक्षाको उचित प्रवन्ध मिलाइएको भन्दै आयोगले ढुक्क भएर मतदान गर्न मतदाताहरुलाई आह्वान गरेको छ ।
मतदानको पूर्वसंध्यामा विशेष पत्रकार सम्मेलन गर्दै आयोगले विहान ७ बजेदेखि ५ बजेसम्म मतदानको व्यवस्था मिलाइएको जनाएको छ । प्रमुख निर्वाचन आयुक्त अयोधीप्रसाद यादवले मतदाता परिचय पत्र लिएर मात्र मतदान गर्न जान आग्रह गरेका छन् । यदि मतदाता परिचय पत्र हराए वा लिन नपाएको भए आयोगले तोकेको बैकल्पिक व्यवस्था अनुसारका कागजपत्र लैजान आग्रह गरिएको छ । आयोगले यदि फोटोसहितको मतदाता नामावलीमा नाम भएको तर हराएको खण्डमा नेपाली नागरिकता, लाइसेन्स, पासपोर्ट, जग्गाधनी पूर्जा वा २०७० को चुनावको मतदाता परिचय पत्र भए मतदान गर्न दिने व्यवस्था मिलाएको छ ।