काठमाडौं । बिहीबार चन्द्रागिरीमा पोजेटिभ भेटिएका ३२ वर्षीय पुरुष पनि उपत्यका बाहिरबाटै आएको पुष्टि भएको छ । सशस्त्र प्रहरीमा कार्यरत ती प्रहरीको स्थायी घर नेपालगञ्ज भएको र उनी विदामा नेपालगञ्ज गएको स्रोतले बताएको छ ।

सशस्त्र प्रहरी स्रोतका अनुसार उनी यसअघि भेटिएकी २७ वर्षीय संक्रमित महिलासँगै एउटै गाडीमा काठमाडौं आएका थिए । यद्यपि उनी सशस्त्र प्रहरीको कार्यालयमा उपस्थित नभई आफ्नो स्वास्थ्य परीक्षण गराएको स्रोतले बतायो ।

‘आज बिहान संक्रमण पुष्टी भएका ३२ वर्षीय पुरुष पनि संक्रमित महिलासँगै एउटै गाडीमा काठमाडौं आएको पुष्टी भएको छ । हामीले उक्त गाडीमा आएका अन्य मानिसहरुको पनि स्वास्थ्य परीक्षण गराइरहेका छौँ । उनीहरुले नेपालगञ्जबाट नै गाडीको पास बनाएर ३ दिन अघि मात्रै काठमाडौं आएको पत्ता लागेको छ । महिलाको श्रीमान पनि सशस्त्र प्रहरीका कर्मचारी भएपनि अहिले संक्रमित भएका पुरुष ती महिलाका श्रीमान भने होइनन् । ती महिलाका श्रीमान काठमाडौंमै थिए । महिला आफ्ना २ जना बालबच्चासँगै काठमाडौं आएकी थिइन् ।’ स्रोतले भन्यो ।

संक्रमण फैलिएको स्थानबाट आएको हुनाले उनीहरुलाई सुरुमै स्वास्थ्य परीक्षणका लागि टेकु अस्पताल लगिएको थियो । त्यसपछि उहाँहरु आ–आफ्नो कोठामा जानुभएको भएपनि अन्य मानिसहरुसँग भेटघाट नभएको स्रोतले बताएको छ ।