चितवन, २१ साउन । करिव दुई महिनापछि भरतपुर महानगरपालिकाको वडा नं. १९ मा भएको पुनःमतदानको नतिजाले चुनावी गठबन्धन गरेका नेपाली कांग्रेस र माओवादी केन्द्रलाई राहत दिएको छ ।
शुक्रबार भएको मतदानको आज घोषणा भएको परिणाम अनुसार वडामा नेपाली काँग्रेसका उम्मेद्वारहरुको प्यानल नै विजयी हुदा मेयर पदमा गठबन्धनकी उम्मेद्वार माओवादी केन्द्रकी रेणु दाहाललाई जितको सम्भावना बढाउने मत प्राप्त भएको छ । वडा नं. १९ को गणना सकिदा रेणु २२१ मतले पछि छ । तर मतान्तर निकै साँघुरिएको छ । वडा नं. १९ को मत गणनाअघि देवि ज्ञवाली ७८४ मतले अगाडी थिए । हिजो भएको पुन मतदानमा सो वाडमा २८७० मत खसेको थियो । वडा नं. १९ को मतगणना सकिदा ज्ञवालीले आफ्नो अग्रताबाट ५६३ मत गुमाए । अब वडा नं. २० को मत गणनामा रेणु दाहालले अग्रता कायम गर्ने सम्भावना प्रवल भएको गठबन्धन पक्षधरहरुको भनाइ छ । निर्वाचन कार्यालयबाट प्राप्त विवरण अनुसार वडा नं. १९ सम्मको मत गणना पुरा हुँदा मेयर पदमा नेकपा (एमाले)का उम्मेद्वार देविप्रसाद ज्ञवालीको कुल मत संख्या ४१ हजार ९४६ पुगेको छ । रेणु दाहालको मत ४१ हजार ७२५ छ । उपमेयरमा गठबन्धनबाट उम्मेद्वार रहेकी नेपाली काँग्रेसकी पार्वती शाहको मत ४५ हजार ६२३ छ । एमालेकी दिब्य शर्मा आचार्यको मत ३८ हजार ६०४ रहेको छ । अब २० नम्बर वडाको मत गनेपछि भरतपुरको सवै २९ वडाहरुको मतगणना सकिने छ। २० नम्बर वडामा ३३०२ मत खसेको छ ।