काठमाडौं, १ भदौं । उर्जामन्त्री महेन्द्रबहादुर शाहीले प्राधिकरण भित्र रहेको कोठा–कोठाको भान्छा तत्काल रोकन निर्देशन दिएका छन् ।
मन्त्री शाहीले विद्युत प्राधिकरणका विभिन्न शाखा र कर्मचारीहरुको कोठा–कोठामा रहेका भान्छा बन्द गर्न निर्देशन दिएका हुन् । एउटा शाखामा मात्रै क्यान्टिन हुनपर्ने र कोठा–कोठामा आफ्नो अनुकुल किचेन राख्न नपाइने उनले बताए । एउटै कार्यालयमा भएका धेरै भान्छाले ठूलो मात्रामा विद्युत खपत गर्ने खर्च पनि बढ्ने भएकाले तत्काल बन्द गर्न उनले निर्देशन दिए ।
यस्तै मन्त्री शाहीले नेपाल विद्युत प्राधिकरण काम नगर्ने कर्मचारीको लिस्ट तयार भएको बताएका छन् । उनले भाषण मात्रै गर्ने र काम नगर्ने प्रवृत्तिलाई अब अन्त्य गर्ने बताएका छन् । विद्युत प्राधिकरणको ३२ औं वाषिर्कोत्सव समारोहमा मन्त्री शर्माले ट्रेड युनियनका कर्मचारीलाई भाषणमा भन्दा काममा केन्द्रित हुन निर्देशन दिए । ट्रेड युनियनका आडमा कैयन कर्मचारी वर्षौंदेखि राजनीतिमा मात्रै केन्द्रित भएको र यसले संस्थालाई ठूलो क्षति भएको उनको भनाइ थियो । ‘कर्मचारीले काम गर्ने हो, ठूला–ठूला भाषण गरेर हिड्ने होइन’ काम गर्न निर्देशन दिँदै उनले भने । ट्रेड युनियनका पदाधिकारी काम छाडेर कर्मचारी सरुवाका लागि हिड्ने गरेको उनको आरोप छ । ‘दलालहरु कर्मचारीको सरुवा र अर्काको कुरा लिएर आउँछन्, त्यस्ता दलाललाई मेरो मन्त्रालयमा निषेध गरिएको छ,’ मन्त्री शाहीले भने । फिटिक्कै काम नगर्ने कर्मचारीको सरुवाका लागि लिस्ट तयार भएको उनले जानकारी दिए । कुन(कुन भेगमा कसलाई पठाउने भन्ने लिस्ट तयार भएको भन्दै उनले सरुवाका लागि तयार रहन कर्मचारीहरुलाई निर्देशन दिए ।
उर्जामन्त्री शाहीले विद्युत ट्रान्सर्फमर पड्कनुमा कर्मचारी नै दोषी रहेको बताए । लापरबाहीपूर्ण तरिकाले ट्रान्सर्फमर जडान गरेकै कारण पड्किने गरेको उनको दाबी छ । मन्त्री शाहीले अब ट्रान्सर्फमर पड्केको ठाउँमा के कसरी पड्कियो भनेर छानबिन हुने बताए । उनले भने, ‘अब ट्रान्सर्फमर पड्कियो भने त्यहाँको अध्ययन हुन्छ, कर्मचारीको दोषले पड्किएको पाइयो भने कार्यालय प्रमुखमाथि कारवाही हुन्छ ।’