काठमाडौं, चैत ३० । सरकारले सबै प्रकारका भ्रष्टाचार र अनियमितता न्यूनीकरणका लागि राष्ट्रिय सदाचार नीति लागू गर्ने भएको छ ।
नयाँ स्थानीय तहको निर्वाचन गर्ने तयारीमा जुटेको सरकारले सदाचार नीतिको मस्यौदा तयार पार्नका लागि कार्यदल गठन गरेको छ । मस्यौदा बनाउने जिम्मेवारी पूर्वसचिवहरु सारदाप्रसाद त्रिताल र मोहन बञ्जाडेलाई दिइएको छ । दुवै पूर्वसचिवहरुले पदमा रहँदा आर्थिक र नीतिगत पारदर्शिता देखाएको भन्दै मुख्यसचिव सुवेदीको पहलमा यो कार्यदल बनाइएको हो ।
यस्तै कार्यदलले भ्रष्टाचार नियन्त्रण तथा सदाचार प्रबर्धनका लागि अन्तराष्ट्रिय असल अभ्यासहरुको पहिचान गरी नेपालको निम्ति उपयुक्त हुने विषयहरु सिफारिस गर्नेछ । सरकारले कार्यदललाई राज्यको पुनर्संरचनासँगै तल्लो तहसम्म पुग्ने अधिकार, स्रोत र साधनमा सदाचार प्रवर्धनका लागि अवलम्बन गर्नुपर्ने नीति र खाकाको मस्यौदा पेश गर्ने निर्देशन दिएको छ ।