बिर्तामोड, ११ कात्तिक । झापाको बिर्तामोडमा भएको गोलीकाण्डमा मृत्यु भएका प्रदर्शनकारी पक्षका अर्जुनधारा–११ का नरेश थापाको परिवारलाई सरकारले राहत स्वरुप १० लाख रुपैयाँ दिने निर्णय गरेको छ ।
शनिबार इलाका प्रहरी कार्यालय अनारमनीमा बसेको राजनीतिक दल, स्थानीय प्रशासन र पीडित परिवारबीचको बैठकले यस्तो निर्णय गरेको हो । यस्तै किरिया खर्च स्वरुप नगरपालिका र जिल्ला समन्वय समितिले २५–२५ हजार रुपैयाँ दिने समेत निर्णय भएको बिर्तामोड नगरपालिकाकी उपमेयर पवित्रा महतरा प्रसाईंले बताइन् ।
मृतक परिवारको सन्तानलाई अध्ययनका लागि नगरपालिकाले खर्च व्यहोर्ने समेत सहमति भएको छ । बैठकले अर्जुनधाराका ११ वर्षीय बालक लक्ष्मण शिवाकोटीको हत्याको विषयमा पीडित परिवारको माग अनुसार पुनः दुई दिन थप अनुसन्धान गर्ने निर्णय पनि गरेको छ । दसैंको टीकाको दिन बेपत्ता भएका अर्जुनधारा–११ का शिवाकोटीको शव त्यसको भोलिपल्ट विर्तामोड–१ वैंसावाडी स्थित झाडीमा फेला परेको थियो ।
शुक्रबार भएको घट्नापछि बिर्तामोडमा लगाइएको कर्फ्युलाई भने स्थानीय प्रशासनले खुकुलो बनाउँदै लगेको छ । तर, कर्फ्यु भने खुलाउने बारे केही सहमति भएको छैन ।
यसैबीच प्रहरीको गोली लागेर एक जनाको मृत्यु भएपछि इलाका प्रहरी कार्यालय अनारमनीका प्रमुख डीएसपी राजकुमार सिलवाललाई जिल्ला तानेपछि उनको स्थानमा जिल्ला प्रहरी कार्यालय झापाका डीएसपी जितेन्द्र बस्नेतलाई विर्तामोडमा खटाइएको छ ।